Aizawl : SCERT-in nimin khan SCERT Auditorium, Aizawl-ah Science leh Mathematics-a tițhate chawimawina hun a buatsaih chu School Education Minister Lalchhandama Ralte-in hmanpuiin, zirlai tițha chawimawina dawngte chu an thiamna leh theihna ram tana hmang țangkai ngei turin a chah.
School Education Minister chuan Mizoram UT laia Assembly session-in zirlaite Science leh Mathematics thiam tura cho chhuahna atana zirlai tițhate chawimawina an lo duang chu a hlawhtlinna hmuh tur a tam ta hle tih a sawi a. UT hunlaia High school-a Science leh Mathematics zirtirtua Mizo awm mang lo pawh tunah chuan Mizo thalai lak tur tam tak an lo awm ta tih a sawi.
Sorkarin zirna kawnga hma a laknaah zirlaibute chu Mizo zirlai ten mahni țawng ngeia an thiam theih nan Biling ual textbook a siam a nih thu leh peih fel țep a nih thu Education Minister chuan a sawi a. Pawl 9 leh pawl 10 zirlaibu ațanga bulțan a nih tur thu a sawi bawk.
Sorkar thuchhuahin a tarlan danin Incentive cash award for proficiency in Science & Mathematics hi kum 1978 ațanga sem tan a ni a, kumin hi vawi 45 semna niin, HSLC atangin mi 66 leh HSSLC atangin mi 20, an vaiin mi 86 in an dawng a ni.