Aizawl : India rama wildlife crime hrang hrang thleng thinte zirchianga a tul anga hma la thintu sorkar laipuia Ministry of Environment, Forest & Climate Change hnuaia Wildlife Crime Control Bureau (WCCB) hotu ten nimin khan Champhai DFO pisa-ah Champhai District official-te kawmin, dan lova ramri kaltlanga nungcha tawlhruk chungchanga hmalak dan tur leh tul dangte an sawipui.
WCCB hotute chuan Mizoram sorkara EF&- CC-in nungcha tawlhruk man te enkawl lailawkna tur Animal rescue & rehabilitation centre din tura sorkar laipuia rawtna a thlen chu a tul anga bawhzuipui an tum thu an sawi a. Dist crime control sub-unit chu kokim taka joint patrolling tam zawk nei tura chah- in, ramri dep state-te nen zau zawka inrawnkhawm a tul thute an sawi.
He inkawmhonaa an tarlan danin, Jan 2021 – Octo 2022 thlengin Champhai district chhungah force leh deptt. hrang hrang hmalaknain dan lova nungcha tawlhruk vawi 7 man niin, thubuai ziahluh vek a ni a; nungcha species hrang hrang tawlhte chu 723 a ni.
WCCB hotute hian Thawhlehni khan ramri enfiahin India leh Myanmar ramri depa awm Zokhawthar khua an tlawh a; Police, Customs leh Assam Rifles hotute an lo kawm tawh bawk a ni.