English Football League Cup third round khelh a ni a. Premier League club-te inlan hun thlengin chesual nghal club pahnih an awm.
Thawhlehni zana inkhelah AFC Bournemouth in Everton an sawp a. London club Brentford pawhin penalty hmangin Gillingham an ngam lo.
Toffees an tla
Everton manager Frank Lampard chuan a team pumpui a thlak danglam a. Premier League club pahnihte insutnaah Bournemouth pawhin an team inremdan atang mi pakua an thlak danglam.
Vitality Stadium-ah Cherries in minute 7-na lekah Everton tlarhnung chetsual avangin Jamal Lowe hmangin goal an khung a. Second half tan turah Junior Stanislas chuan an goal hnihna a khung ve bawk.
Substitute Demarai Gray chuan Everton tan goal khat khung mahse Cherries an phur tawh laklawh a. Emiliano Marcondes leh Jaidon Anthony ten goal khungin round of 16 a an hmun an tichiang.
Bournemouth hi manager Gary O’Neil hnuaiah match li chhung tlawm tawh an ni a. Mahse cup inelna a an chetthat chuan a tan a nghet a club enkawl theih a beiseiawm ang.
Brentford an chesual
League Two club Gillingham in zan duhawm an hmang a. Penalty shootout-ah Brentford hnehin kum 26 chhunga a vawikhatna atan Carabao Cup fourth round an lut.
Gtech Community Stadium a inkhelte hi Premier League club leh English football a division palina a khel mekte an ni a. Thomas Frank-a’n a first team player tha te khelhtir nual mahse an che fuh thei lo.
Ivan Toney chuan minute 3-naah goal a khung nghal a. Goal dang erawh khung belh thei lovin minute 75-naah Mikael Mandron chuan Gillingham si phurh a sut.
Penalty hmanga chak zawk zawnnaah a tir panga in an pet goal ve ve vek a. Sudden death-ah Alex MacDonald chuan Gillingham tan a khung laiin Brentford tana pettu Mikkel Damsgaard chuan crossbar a pet per a. Gills an lawm ta zawk.