Player 10 ni chungin darkar khat chuang khel mahse Barcelona in hnehna an chang thova, Thawhlehni zanah Osasuna 2-1 a hnehin La Liga-ah an sang ber.
Pamplona a Estadio El Sadar a inkhelah Barcelona hian first half-ah darkar chanve vel chauh an khel hman tihin striker Robert Lewandowski chu red card a hmuh avangin tlem zawkin an khel.
Polish striker hian David Garcia laka a foul avangin yellow card a hmu nawn a. Garcia hi Osasuna goal khungtu ni bawkin minute 6-na lekah corner atanga ball vawrh luh a tauh lut.
Inkhel boruak a sang a, card pawh phawrh a ngai ngun. Halftime dawnah chawl tawh tur Gerard Pique chu substitute bench atanga a lo tawng ve avangin a luh hma in hnawhchhuah a ni bawk.
Second half-ah tlem zawk chungin Barcelona an insiamrem a, an talbuai phah lo chu an fakawm.
Chawlhlawk zawh hnu lawkah Pedri chuan goal a khung a. Minute 85-naah Raphinha in chakna goal khungin Ferran Torres goal pawm loh a awm bawk.
Barcelona coach Xavi Hernandez chuan, “Kan team leh kan dressing room boruak zawng zawngte hi fak loh theih a ni lo. Vawiinah kan tana harsa thei ang ber ni turin engkim a kal a, mahse rilru fim nen kan khel a, hun pawimawhah tihsual kan nei miah lo.” tiin inkhel zawhah a sawi zui.