Prime Minister Narendra Modi chuan kum zabi 16-na hun laia tual chhung hruaitu, Bengaluru (Bangalore) dintu, Kempegowda-a lim a hawng.
Metre 33 (108ft)-a sang bronze-a siam lim hi tonne 220 zet niin Karnataka state khawpuia international airport-ah hun a ni.
Chanchinbute chuan Rs. maktaduai 850 man niin an tar lang.
Kum 2019 khan state sorkar chuan lim siamna tur leh theme park siamna turin Rs. tluklehdingawn 1 a lo ruahman tawh a ni.
State minister pakhat chuan milim chu Bengaluru thanna entirtu a nih thu leh ‘thanduanna milim’ tiin a sawi.
‘India ram Silicon Valley’ tia an sawi, Bengaluru khawpui hi India rama IT company lian ber ber leh start-up tam tak hmunpui a ni.
Milim hi Ram V Sutar-a chher niin ani hi Gujarat-a ‘inpumkhatna milim’ chhertu tho kha a ni a. Sardar Vallabhbhai Patel-a lim hi ft 600 laia sang niin khawvela milim sang ber a ni nghe nghe.
Kempegowda-a lim hi he state-a assembly inthlan neih tur hma lawka hawn a ni.
Politics thiamte chuan rorel lai, BJP sorkarin hnam sang, Vokkaliga-ten an lam an hawi lehzual theih nana an tih niin an ngai a, Kempegowda pawh he hnam hi a ni.
Vokkaliga hi Karnataka-ah hian Old Mysore region an tihah tam zualin Bengaluru telin district pariat vel huam a ni a. BJP hian heng hmunah hian inthlanah hnehna an chang a nih chuan eptu – Congress leh Janata Dal (Secular) tanrual loh chuan chet a har dawn a ni.
Kempegowda-a hi Karnataka-ah chuan an dah san tak a ni a. Vijayanagar empire-a tel niin India chhim lamah hian kum zabi 14-na atanga 17-na tir lam thleng ro an rel.
Historian Suryanath Kamath chuan Kempegowda hian tuna Bengaluru awmna velah hian kum 1513 leh 1569 inkarah ro an rel ngei tih finfiahna a awm tih a sawi.
Mi thiam dang thenkhat chuan thil laih chhuah atangin kum 1608 thleng a dam zawk niin an sawi bawk.