Police-te chuan Mozambique hmar lama Cabo Delgado province-a khaw eng emaw zat beihnaah ni thum liam ta chhung khan mi 50 chuang an lu tansak leh thah an ni tih an sawi.
ISIL nena inzawmna nei firfiak pawl hian Miudumbe leh Macomia district-a khaw tam tak an bei a. Civil mite an that a, hmeichhia leh naupang an ru bo va, in tam tak an hal bawk niin Mozambique police-a commander-general Bernardino Rafael chuan Thawhlehnia thuthar lakhawmtute a kawmnaah a sawi.
“In tam tak an hal a, a chengte chu an theih ang angin ram hnuaiah tlan chhiain an biru,” a ti.
Hmututen tual chhung chanchinbu hnenah mi sualte hian khaw mipuite chu Muatide khaw khelmualah an khalh khawm a, an that ta mai niin an sawi.
Zirtawpni zan khan Nanjaba khuaah mi dsual silai kengten silai hmet puakin in tam tak an hal niin Mozambique News Agency chuan dam chhuakte thu sawi a chhuah chhawng a. Mi pahnih lu tan niin hmeichhe eng emaw zat an ru bo bawk.
Pawl dangin Muatide khua an bei bawk a, mi 50 chuang lu an tansak niin news agency hian a tar lang bawk.
An lu an tansakte ruang hi an chan sawm a, Zirtawpni zan atanga bei kha Pathianni thleng an awm chilh niin Pinnancle News portal chuan a sawi.
Thawhtanni khan puitling ruang panga vel leh mipa naupang 15 ruang chu Muidumbe district-a ram ngaw thennaah hmuh chhuah a ni.
“Police-te hian ram hnuaia thing kara ruang chhar a nih hnuah chauh helhovin mi an suat tih an hre chauh,” tiin an thenawm, Mueda district-a officer pakhat, a hming tar lan duh loh chuan a sawi.
“Metre 500 vel huam chhungah ruang 20 a lo awm a, heng mite hi thalai tak tak an ni,” a ti.
Mueda-a tanpuitu pawl tana thawk, a hming tar lan duh lo bawk chuan insuatna a thlen ngei thu a sawi ve bawk a. Ruang thenkhat chu an chhungte hnenah vui tura thawn a nih thu a sawi bawk.