Congress President Lalsawta chuan, Mara district-a Congress party an thlawp avanga MNF party-in zuamawmah ngaia, an zarzotu anga an ngai dawn a nih chuan sorkar an siampuina lak atanga inhnukdawk nghal turin a ti.
Zirtawpnia Congress Bhawan-a party chhung inkhawm neihah thu sawiin Lalsawta hian, MNF sorkar hi Mizoram tan an that loh avangin nasa takin an la bei dawn chauh tih sawiin, “Mara District-ah min sawm nasat em avang leh Mara lama kan hruaituten Mara mipui an ngaihtuah em avangin sorkarna an siampui a. Hei hi Congress party-in mipui tana kan hmalakna turah min daltu tur a nih dawn chuan Mara District-a min support-na pawh saw MNF hian withdraw mai rawh se. Mara District-a min thlawp avanga Congress Party hi zuamawm a min ngai a nih a, an zarzo tu anga min ngai dawn a nih chuan an duh hun hunah withraw rawh se,” a ti.
Mizoram hian hun reilote chhungin hun thar a chuangkai a, mipui hian thil thar an duh a, an beisei tlat tawh avangin danglam ngam a ngai tawh tih sawiin Lalsawta hian, tunhmaa an tih thin tam takte kha an tih a rem tawh lo a, mipui hian sorkar tha, eiru lo, mipui hmangaihtu an duh tawh tih a sawi a. “Mi leh sa ngai reng pawh ni mah ila, kan rilru leh ngaihtuahna hi kan siamthar a ngai ani,” tiin, kalpui hlui ang ringawta kal tumna hi bansan a tul tih a sawi.
Lalsawta hian, “mipui rawngbawlna hi kawng nuam a ni lo a, kawng chho, kawng hahthlak tak a ni; nawmsak tum tan mipui rawng a bawl theih loh. Kan tawrh a ngai a, kan inpek a ngai. Ram siamthat kan tumnaah hian kan party kan sorkarna tur a nih phawt chuan kan inpek ral a ngai dawn, ‘A tul chuan midang ka kian thei e,’ kan tih ngam hial a ngai ang,” a ti.
Mizoram hi eirukna nen natna chi hrang hrang a bawk mek chu Pathian tanpuina zarah Congress party chuan a damdawi an nei tih sawiin, “Keini chu kan corrupt ve lo ang, keini chuan mipui kan hmangaih a, an tana tha tur hlirin kan ti dawn. Vawiinah hian thil tih theih loh ka sawi lo, ram danga pawh an tih theih, keini pawhin kan tih theih ve ngei thil ka sawi a ni,” a ti bawk.
Congress party chhung inkhawmah hian tun hnaia MNF Secretary nihna bansana Congress party zawm thar, Serchhip bial vil tura Congress President Lalsawta’n a puan R Vanlaltluanga pawhin thu sawiin, ZPM hi boruak tha tak angin lang mah se, rorelna chang tak tak tur leh sorkar tur chuan mipuiin an ring tak tak chuang lo niin a sawi a. MNF pawh an sorkarna hnuaia sum leh pai a harsat bakah ram hmasawnna pawh an thawk thei tak tak lo niin a sawi a. Congress-in mi rintlak, sum leh enkawla mi hmingtha, a chanchin pawh sawi nuam tak Lalsawta President a nei a, midangte tana malsawmna thlentu lo ni tawh thin Congress party hi a sorkar leh ngei a ngai tih a sawi.