Democrats chuan state pawimawh, Nevada-a hnehna an chan hnuah US Senate chu an thunun chhunzawm leh thei dawn ta.
Senator Catherine Cortez Masto chuan president hlui, Donald Trump-a thlawp, Republican candidate Adam Laxalt chu a hneh ngei dawn niin a lang tawh a ni.
Tun tum midterm inthlan hi kum 20 zet chhunga United States-a rorel lai party an chet that ber tum a ni.
President Joe Biden chuan lawm thu sawiin Republican-te tan ‘tu nge an nih’ tih inzawh hun a nih thu a sawi.
Democratic Senate Majority leader, Chuck Schumer chuan American mipuite chuan Republican Party-in ‘tharum kaihhnawih’ an kalpui chu an hnawl tih a chiang hle tih a sawi bawk.
Democrat hian Senate-ah hian seat 50 an luah ta a, Republican-in 49 an nei ta a ni.
Seat khat la awm, Georgia chu December-ah an inthlang dawn a. Senate-ah hian party pahnihin member inzat chiah an neih chuan Vice-President Kamala Harris-i’n vote a thlak ve thin a ni.
Republican hian rorelna in pakhat zawk, US House of Representatives chu Thawhlehnia vote thlak chhiar mek zel laiin an thunun chhunzawm dawn niin a lang ve thung.
Republican-te hian House hi an thunun zui zel a nih chuan Biden-a’n thil kalpui duh a neih tam tak chu an hnawlsak ve thei dawn tho a ni.
“Vote thlak an tam kha mak ka ti lem lo va, ka lawm a, kan candidate neih that rah a lang a ni,” tiin Cambodia-a summit hmanga zin mek, Biden chuan a sawi.
Schumer-a ve thung chuan an ram chuan ‘mipui rorelna an la ringtawk a, nasa taka beih chhung chuan chu chu a lang chhuak leh thin’ niin a sawi.
Nevada-ah hian Cortez Masto-i leh a khingtu, Laxalt hi midterm inthlan chhung zawngin an inbei tawk hle.
Republican Laxalt-a hian kum hnih kal taa President Trump-a’n inthlanah thil fel lo a awm tih a sawi kha a thatpui a. Tun hnaia ngaihdan lakah pawh Latin miten an duh hle a, hengho hi Nevada-a voter panga zela pakhat ang vel an ni.
Mahse, Cortez Masto-i zawkin hnehna a chang ta a, chu chu an party-in Senate an thunun theih phahna a ni ta bawk a ni.
Nevada inthlan result hi Republican tan chuan a pawi hle a, nasa taka President Biden leh a Democrats beiin Senate thunun tum kha an ni.
Hetih lai hian Republican-te hian House erawh nghet zawkin an thunun a, Democrats pawh beisei aiin an che tha tho bawk.
Kum 2020 president inthlana dik lo taka thil tih a awm tia nasa taka sawitu, Trump-a pawh midterm-ah hian a tang hle a ni.
Trump-a hian kum 2024 inthlanah president chuh a tum leh tih a puan thuai rin a ni a; mahse, tun inthlana amahin a puih candidate-te chet that dan leh chet chhiat dan a inpawlh nasa hle.
Republican Missouri Senator Josh Hawley chuan Senate result puan hnuah hian an party chu ‘a thi’ nia sawiin thil thar a ngaih thu a sawi.