Supreme Court-in Ram Janmabhoomi-Babri Masjid thubuai a rem fel hnua Ayodhya-a mosque sak hna chu December, 2023-ah zawh hman a nih a beiseiawm tih a enkawltu trust chuan an sawi.
“Mosque, damdawi in, vantlang choka, library leh research centre tur ruahmanna chu Ayodhya Development Authority atangin tun thlaah pawmpuina hmuh hman a beiseiawm a. Kan sa tan nghal thei ang,” tiin Indo-Islamic Cultural Foundation Trust secretary Athar Hussain chuan PTI a hrilh.
Dhannipur Ayodhya Mosque hi December, 2023-ah chuan acre ngaa zau, Maulvi Ahmadullah Shah Complex-ah hian an sak zo hman dawn niin a sawi bawk.
Supreme Court-in kum tam tak thubuai lo awm tawh, Ayodhya buaina tifelin tun hmaa Babri Masjid lo din thinna, acre 2.77-a zauvah Ram temple sa turin a ti a, hmun dangah mosque sak nan acre ngaa zau ram pek turin a ti thung.
Temple sakna tur lung hi Prime Minister Narendra Modi chuan August, 2020 khan a lo phum tawh a, temple trust chuan inkhawm duhte tan January, 2024-ah peih hman an tum tih an sawi.
Temple leh mosque hawn hun tur hi kum 2024 kum chawhma lama parliament inthlanpui tur thlir rana tih a nih a rinawm.
Uttar Pradesh Sunni Central Waqf Board-in mosque sakna tura a din, Indo-Islamic Cultural Foundation Trust chuan mosque-ah hian damdawi in, vantlang choka, library leh research institute sa tel turin an ruahman a ni.
“Trust hian a sak hna hi a tan thuai dawn a, mosque hi a tet avangin sak zawh hmasak ber a ni ang a. A sak hun tur bi tuk a awm chuang lo na a, kum khat vel chhunga sak zawh a nih kan beisei,” tiin Hussain chuan a sawi.
Mosque leh a vela awm tur thil sakna tur hian sum pawh an tuak nasa tih a sawi bawk.
Hussain chuan damdawi in hi a tirah khum 100 dah phawt a ni ang a, khum 200 awmna tura tihlen a nih tur thu a sawi a. Vantlang choka hi ni tin mi 1,000 ei siam theihna tur leh pek chhuah nen mi 2,000 ei tur siamna hmun tur a nih thu a sawi.
Trust chuan Indo-Islamic Research Centre leh library dina a tlawhtute an chhawr theih turin ruahmanna an siam tih a sawi bawk.
Hussain chuan thla khat vel liam taah khan mosque leh a kalpui thil dang atana ruahmanna chu fire department-in an hnawl tih a sawi a, hei hi a panna kawng a zim deuh an tih vang niin a sawi.
District thuneitute pawh hei hi an hrilh a. Kawng tihzau nan hian thuneitute hnenah ram pawh an dil belh tih trust secretary chuan a sawi.