Mizoram sorkarin October 10, 2022 atanga luia nungcha man khapna thupek a kalpui mek chu mipuiin an zawm tha a, dan bawhchhia hrem an la awm lo.
Mizoram sorkar chuan Mizoram Fisheries Act, 2002 Sec. 5 (1) leh (2) behchhanin, nghalim, nghadawl, chakai, chengkawl leh kaikuangte inthlahpun hun, October 10 atanga December 18 chhungin nungchate hi man a khap.
Closed season an kalpui mek chhung hian dan bawhchhia man ngai leh hrem ngai an la awm lo tih Fisheries Director F Vanlallawma chuan The Zozam Times a hrilh.
Luia nungchate man khapna thupek chu mipuiin an zawm thaa an hriat thu sawiin, “Luia nungcha awm humhalh kawngah hian Mizoram mipuite pawh an thangharh chho tawh hleah kan ngai,” a ti.
Fisheries director chuan luia nungchate humhalh kawngah an department leh YMA an thawh dun thu sawiin, “YMA branch hrang hrangte chu an khaw bul hnaia luikamahte an duty thin,” a ti a, YMA duty-te chu department-a thawktute pawhin an tlawh kual thin thu a sawi.
F Vanlallawma chuan luia nungchate chu inthlahpung lova man rem a ni thin chu a pawi a, department-in an duh ber chu inthlahpung se, humhalh thata a lo tam hunah sum chang thei tura hmalakna kalpuite a nih thu a sawi bawk.
Sorkarin closed season a puan chhunga luia nungcha man luite chu Mizoram Fisheries Act hmangin thla khat aia tlem lo lung ina tantir emaw, Rs. 5,000 chawitir emaw, a pahnihin emaw hrem an ni dawn a ni.