Football a North East champion ni tur zawnna a inkhel tur a hriat tawh a. 2nd North East Olympic Games 2022 final-ah a thlengtu Meghalaya leh Mizoram te an inkhel dawn.
Polo Ground a MFA Turf-ah Pathianni chawhma khan Mizoram leh Nagaland an inkhel a. 3-1 in Mizoram in hnehna an chang.
Inkhel tan atangin Mizoram an langsar zawk a, inkhel thununtu an ni. Mahse goal khung hmasa erawh Nagaland niin minute 11-naah Nagaland winger Pursunep chuan goal mawi a khung.
Si phur zawk ni chungin Mizoram inkhel a tlahniam lova, Under-21 player-ten zam miah lova an khelh rah a lang thuai.
Minute 24-naah Joseph Lalvenhima’n a penalty hlawhchhuah a khung a. Minute 39-naah Aron Vanlalrinchhana chuan an goal hnihna khungin minute 51-naah Rohlupuia’n an goal thumna a khung.
Final a an khingpui tur Meghalaya hian Manipur nena inkhel hmuhnawm leh tang takah Figo Syndai leh Nelson Rymbai ten goal khungin 2-0 in hnehna an chang.
Vawiin chhun dar 11-ah hmeichhe semi-final ah Mizoram leh Manipur an inkhel ve leh ang.