- Ruata
India ram leh khawvel hmundangah pawh an nghahhlelh, Royal Enfield cruiser bike, khawl lian zawk hmang chu EICMA 2022-ah khan phochhuah a ni ta a, a hmingah Super Meteor 650 an vuah a. India-ah chuan Goa-a rider mania-ah phochhuah hmasak ber a ni thung a, he bike mawi leh ta tak mai, a man erawh Royal Enfield bike-a a man to ber ni tur hi nakum January thlaah lei theih tura tlangzarh a ni dawn a ni.
Royal Enfield Super Meteor 650
Royal Enfield Super Meteor 650 hi Royal Enfield 650cc lirtheiah a pathumna tur a ni a, an 650cc platform hmang tho mahse a pian a danglam avang leh cruiser a nih dawn avangin chassis thar hlak a hmang a. He bike tharah hian upside down fork (USD fork) chu Royal Enfield bike zinga a hmasa ber atan kan hmu a, full LED headlight nei hmasa ber a ni bawk a, standard fitment anga Tripper Navigation pod nei hmasa ber a ni bawk a ni. A khawl lamah chuan 648cc oil-and-air-cooled khawl a hmang dawn a, hei hian 47hp power leh 52Nm torque a pechhuak thei dawn, a torque thawh dan erawh cruiser a nihna angin a bike mil turin Royal Enfield chuan a her danglam thung a ni. RE 650cc bike dangte aia a danglamna dang chu a engine casing leh head te hi a rawng an ti dum a ni.
A seat san zawng hi 740mm niin a hniam tha viau a, hetihrual hian a ground clearance erawh a hniam lam hret 135mm a ni thung a ni. A fuel tank-ah hian 15.7-litre petrol a leng a, petrol thun khah vek hian a bike rihzawng hi kg 241 a ni a, tunhnaia chhuak Royal Enfield bike hoah chuan a rit ber a ni dawn bawk a ni.
Super Meteor 650 hi variant hnih – Standard leh Tourer te a awm a. Standard hi tlema phelh ruah hret, dak nalh zaih mai, pillion seat tereuhte nei a ni a. Tourer thung chuan windscreen lian tak, pillion seat lian tha tak leh nghenchhan a nei a ni. Super Meteor 650 rawng chi thum – Astral, Interstellar leh Celestial te a awm a. Royal Enfield bike dang ang bawkin accessory hrang hrang vuah belh tur a awm nual a, an mamawh ang vuah belh tur hrang hrang a leituten an vuah belh thei dawn a ni.
Royal Enfield hian Goa a Rider Mania chhimtute tan chuan pre-booking an hawn sak nghal a, hetihrual hian mipui nawlpuiin an book theih hun tur chu tlangzarh fel a nih hun, nakum January-ah a nih hmel a ni. A man tur hi puanzar a la ni lo a, chiang taka sawi theih a la awm lo na a, media report thenkhatin an tarlan danin Rs.Nuai 4 man bawr vel a nih beisei a ni.
Royal Enfield atang hian cruiser huangah chuan 350cc leh 500cc bike te kan lo hmu tawh thin a. Tunhnaiah 500cc bike ho an tihtawp avangin cruiser huanga an bike ho leitute chuan 350cc chauh duhthlan tur an nei rih a. Bike khawl lian hret, zinpui nuam bawk si duhtu tan Royal Enfield-ah duhthlan tur a awm loh laiin tunah hian cruiser khawl lian tha tak, changkang bawk si an rawn tichhuak ta a, hei hi bike rider tam tak tan thu lawmawm tak a ni a. Mizoram ngeiah pawh lei duh hi an tam a rinawm viau a ni.