Indonesian thliarkar, Java chu lirnghingin sawiin mi 40 chuang thiin mi za telin hliam an tuar bawk tih tual chhung thuneituten an sawi.
Magnitude 5.6-a na lirnghing hian West Java-a Cianjur khua a sawi a, lei hnuai km 10-a thuk atanga intan niin US Geological Survey chuan a sawi.
A sawi hi an khawpui, km 100 chuanga hla, Jakarta-ah pawh hriat niin in chhawng sanga khawsate chu thiar chhuah an ni.
Thuneitute chuan nghing nawn leh (aftershock) pawh a thlen theih thu leh thi pawh an pun theih thu an sawi.
Lirnghingin a sawina lai hi mihring cheng an tamna hmun leh lei min a tamna hmun a ni a, in sakte pawh a rinawm lo hle a. Chhanchhuah hna thawktute chuan in chim kara mi tang lak chhuah tumin an bei nghal a, nu pakhat leh a naute an la chhuak thei niin tual chhung chanchinbute chuan an tar lang.
Cianjur khaw hotu, Herman Suherman chuan tual chhung chanchinbute hnenah mi 46 vel an thih thu a sawi.
“Thite hi hmun hrang hranga mite an ni a, mi 700 vel hliam an awm bawk,” tiin Kompas TV hnenah a sawi.
A hmain AFP news agency chuan hliam tam zawk hi ruh lam khawih, in chima tang leh thil tla velin a delhte an ni hlawm niin a sawi tih an tar lang tawh bawk.
“Ambulance-ten damdawi in atangin khaw hrang hrang an pan mek,” a ti bawk.
“Khaw tam takah chhungkaw eng emaw zat thiar chhuah theih loh an awm,” a ti bawk.
Social media-ah in leh dawr chim chhia thlalak leh video tam tak thehdarh a ni.
National Disaster Mitigation Agency-in thuchhuah an siamah Cianjur region-ah chuan in tam tak a chhia tih an sawi a. Damdawi in leh Islamic boarding school pawh a chhe tel tih an sawi.
Jakarta khawpuiah chuan sorkar pisa leh sumdawnna hmuna thawkte chu a nghin lai hian pawnah an tlan chhuak nasa hle a, a sawi chhung hi minute khat emaw vel a ni.
“Hna ka thawh mawlh mawlh laiin ka hnuai chhuat chu a insawi a. A nghing chu chiang takin ka hre thei a, engmah tih nachang pawh ka hre mai lo va; mahse, a na zel a, hun reilo te chhung chauh erawh a awh,” tiin dan hre mi pakhat, Mayadita Waluyo chuan AFP news agency hnenah a sawi.
Pisaa thawk pakhat, Ahmad Ridwan chuan Reuters hnenah, “Hetiang lirnghing hi Jakarta-ah hian kan hre fo tawh thin a; mahse, mite an chiai nasa hle a, kan phili hle a ni,” a ti.
Indonesia hi Pacific tuipuia tectonic plate che reng chunga awm a ni a, ‘ring of fire’ an tih huam chhunga awm a nih angin lirnghing an hre zing hle a. Khawvel huapa lirnghing leh tsunami lian ber ber thlenna hmun niin kum 2018-a Sulawesi lirnghingah pawh khan mi 2,000 chuang an thi.