Aizawl: Mizoram Pharmacists’ Association huaihawta buatsaih, ‘Seminar on Development of Pharmaceutical Sciences in Mizoram’ chu Health Minister Dr. R. Lalthangliana’n nimin khan a hawng a. National Pharmacy Week a hawng nghal bawk.
DHME Conference Room, MINECO-ah hawnna inkhawmah khuallian chuan damdawi hriatna lama mi thiam, pharmacist-te mawhphurhna chu khawvel hmasawn zelah a pawimawh tih sawiin, “Natna enkawl nana damdawi lei tur dik leitir chungchangah te, mipuite lo puitu leh mipui hriselna atana thui tak sulsutu leh damdawi dik ei kawngah hlawk taka thawktu an ni,” a ti.
Health minister hian damdawi chungchangah mipui an thang harh mek zel a, damdawi nihphung, a hnathawh leh a nghawng te, a ei dan tur dik te hi mipui leh damdawi hmangtute zirtir hi an mawhphurhna pawimawh tak a nih avangin, damdawi hriatna kawngah pawh hma an sawn a, an inchhiar zaute pawh a tul zel niin a sawi.
He hunah hian Implementation of Pharmacy Practice Regulations, 2015 (Amendmend, 2021) chungchang sawiho niin MZU-a Pharmaceutical Science Department hawn a nih theih nan hmalak dan tur sawiho a ni bawk.
Seminar zawh hian health minister chuan Mizoram State Pharmacy Council Office tur atana hmun awl a en nghal.
He hunah hian Principal Director Dr. T.Lalhmangaihi, Joint Director, Drug Controlling Authority Lalsawma leh Aizawl Civil Hospital leh RIPANS atangin khuallian hi an tawiawm a ni.