World champion ni chiang tawh Max Verstappen chuan kumin Formula 1 season chu hnehna nen a khar a. Pathianni zana Abu Dhabi Grand Prix-ah pakhatna hauhin tun season-ah a vawi 15-nan a chak.
Yas Marina Circuit-ah a hmasa ber atanga tlan tan in Verstappen a buai lo tluan a, hahdam takin pakhatna a hauh.
Intlansiak tihmuhnawmtu erawh world championship a pahnihna inchuhte an ni a. Red Bull car khalhtu Sergio Perez leh Ferrari driver Charles Leclerc te an inum.
Car tlanchak thei zawk nei Red Bull driver in pahnihna luah thuai mahse Ferrari lamin a tawp an khar tha a. Leclerc zawkin pahnihna a hauh.
Ferrari in bul tanna a an vuah medium tyre chu an tlanchakpui lo, hei hi Red Bull dinhmun thatna a ni. Mahse hard compound an vuah hnuah erawh an zia a. Perez hian a car ke vawi hnih a thlak laiin Leclerc-a’n vawikhat chiah thlakin a tawp thleng ring tlang turin dim takin a tlan zova. A hlawhtling zawkah a tang ta a ni.
He intlansiak hi vawi li world champion ni tawh Sebastian Vettel-a intlansiak hnuhnung ber a ni a. German legend hi F1 a chawlhsan tawh dawn.
A thlahna inkhelah Aston Martin car khalhtu hian 10-na a luah a, point pawimawh hmu in constructor inelnaah Alfa Romeo nen an point a inang.