United States-a Virginia state chhung, Chesapeake-a Walmart supermarket chhunga mi pakhatin silai a hmeh puahnaah mi pasarih vel an thi tih thuneituten an sawi.
Silai hmet puaktu hi store manager nia hriat niin mi a kah hnuah hian amah pawh a inkap a, a thi.
City of Chesapeake chuan a hmain ‘silai hmet puak an awm a, thi pawh an awm’ tiin Twitter-ah a tar lang.
Inkahnaah hian mi eng emaw zat hliam tuar pawh an awm a, a kaptu hian engvanga hetianga ti hi nge tih hriat theih a ni lo.
Police chuan silai hmeh puah hi an ram sanaa Thawhlehni zan dar 10:12 (India-a Nilaini zing dar 8:42)-a thleng a nih thu thuthar lakhawmtute hnenah an sawi.
Online-a video thehdarhah chuan Walmart uniform ha pakhatin silai hmeh puah laia thil thlen dan a sawi.
A sawi dan chuan staff room a chhuahsan chiahin manager lutin silai a hmet puak zui tih a sawi.
“Kan mi leh sa kan chân nual a ni,” a ti a. A thawhpui mi engzat chiah nge kah an nih erawh a sawi thei lo.
Police thupuangtu, Leo Kosinski chuan silai hmet puaktu hian dawr chhungah a hmet puak a, amah chauhva che nia an hriat thu a sawi.
Walmart chuan thuchhuah siamin ‘thil thleng lungchhiatthlak takin a barakhaih hle’ tih an sawi a, dan leh thupek kengkawhtute nen a buaipui zui zelnaah an thawhho zel thu an sawi bawk.
Chesapeake-a police hnen atang hian Nilaini tuk (India-a thim hlim)-ah thil thlen dan kimchang leh hma an lak zui dan hriat theih a nih a beiseiawm.
Sentara Norfolk General Hospital thupuangtu chuan an damdawi inah mi panga hliam tuar an enkawl mek tih a sawi niin tual chhung television station WAVY-TV chuan a puang.
Hmeichhe pakhat chuan a nuta, kum 20 mi chu a hna thawh hun intan atanga minute 10 lekah kah a nih thu WAVY-TV hnenah hian a sawi.
Mahse, a nuta hi a thi lo va, a chhungte biain text pawh a thawn a, a ngaihtuahawm hran loh tih a hrilh thei.
Hmeichhe dang pakhat, Joetta Jeffery chuan CNN hnenah silai a puah lai hian a chhungah a nu a awm ve thu a sawi a, ani pawh a him a, a chhungte hnenah hian an dinhmun hrilhin text message a thawn thei.
Jeffrey-i chuan a nu chu a na zinga a tel ve loh thu a sawi a; mahse, a thil tawn chuan a khawih na hle tih a sawi.
Virginia Democratic senator Mark Warner chuan ‘inpawngkahna dang thleng a awm tih thuthar a hriat leh chuan a tina hle’ tih a sawi.
Virginia state Senator L. Louise Lucas, Democrat tho pawhin thil thleng chuan ‘a rilru a tina tak zet’ tih a sawi bawk.
Twitter-ah, “Kan rama silai chelekna tam lutuk hi a tawp hma chu ka chawl dawn lo,” tiin a tar lang bawk.
Thawhlehnia thil thlen hma lawk hian Colorado state-a LGBT nightclub pakhatah mi pakhatin silai hmet puakin mi panga an thi a, mi dang 17 laiin hliam an lo tuar tawh bawk.
Kum 2019 khan El Paso, Texas-a Walmart-ah tho inpawngkahna hi lo thleng tawhin mi 23 zet an lo thi tawh bawk.