Jerusalem khawpuia bus stand-a bomb pahnih tihpuak ni ngeia hriatah rawlthar a thi a, mi dang 14-in hliam an tuar bawk tih Israeli police-in an sawi.
Bomb puakte hi miin an hnathawhna hmun pana an kal lai, khawpui daia hmun lun lai tak ve ve-ah a ni.
Thi hi a puak hmasa zawka hliam tuar mi 12 zinga mi a ni a, a pahnihnaah hian mi pathumin hliam an tuar.
Israel-a internal security minister chuan a puahna hmun pakhat zawk atangin ‘hetiang beihna hi hun rei tak kan hriat tawh loh a ni’ tih a sawi.
Kuminah hian silai leh chem nena Israeli-te beih a hluar hle a, hei vang hian Israeli sipaite pawhin West Bank-a Palestinian khawpuite an luhchilh zin phah hle a. Hetih lai hian Jerusalem-a thil tihpuaha beihna ang chi hi chu kum tam tak a thleng tawh lo thung.
A puak hmasa hi Givat Shaul-ah niin khawpui luhna pui ber bul lawk a ni a, an ram sanaa Nilaini zing dar 7:05 (India-a zing dar 10:35)-ah a ni a. Minute 30 chuang a liam leh hnuah khawpui luhna tho, Ramot Junction-ah a puak zui leh a ni.
A puahna pakhat zawka thil thleng video thehdarhah chuan mipui an tlanchhe nasa a, khawlaiah thil kehthem a darh nuaih bawk tih a lang.
Israeli police chuan an chhui tawh chinah heng hmunah hian thil puak thei daha tihpuah a nih thu an sawi a, officer-te chuan ‘a ruala firfiaka chetna’ tiin an sawi.
Haaretz chuan bomb-ah hian perek eng emaw zat dah tel niin ral atanga tihpuah a an thu police-ten an sawi tih a tar lang.
“Tuk chhuah hrehawm tak a ni,” tiin Israeli Internal Security Minister Omer Bar-Lev chuan thuthar lakhawmtute hnenah a sawi.
Police Commissioner Kobi Shabtai chuan vantlang hnenah eng emaw thil pangngai lo deuh hriat leh hmuh an nei a nih chuan emergency service hriattir vat turin a ngen.
Prime minister kal chhuak tur, Yair Lapid chuan an ram security chief-te nen special meeting a ko nghal tih Israeli chanchinbute chuan an tar lang.
Prime ministe thar tur, Benjamin Netanyahu leh a Likud party chuan far-right leh religious party te chu tangrual sorkar siampui tumin an la dawr zel a. Tun thlaa inthlanpuiah khan hnehna an chang a ni.