Meghalaya thingtlang khaw mite chuan Assam nena ramria an inmil lohna hrula tharum thawhna thlenga mi paruk an thih hnuah Assam-a West Karbi Anglong district-a forest department pisa chu suasamin an hal tih thuneituten Nilaini khan an sawi.
Thawhlehni zan khan Meghalaya-a West Jaintia Hills district chhunga Mukroh khaw mite chu ramri hrul, Assam lama Kheroni Forest Range beat office tualah pung khawmin an hal a ni.
Mipuite hian forest office hi nasa taka an suasam hnuah a bungrua, lehkha pawimawh leh a hung chhunga motorcycle awmte chu an hal tih thuneituten an sawi.
He pisaa thawk forest department tumah thi leh hliam erawh an awm hriat a ni lo tih thuneitu sang pakhatin PTI a hrilh.
Khaw mite hi police leh venhim hna thawktu dangten an hmun an thlen hmain an kal bo leh hman tih a sawi bawk.
Meghalaya-ah Assam atanga lut car pakhat khawih a ni tih thawm a awm hnuah Assam Police chuan lirthei neitute chu an sahimna atan an thenawm state-ah lut rih lo turin an ngen.
Assam atanga Meghalaya luhna khan, Guwahati leh Cachar district pawh telin, police-in kawngpuiah a dalna siamin tlangram state-ah Assam number plate intar lirthei lut tur an dang.
“Nimin atang khan boruak a pangngai hma chu Meghalaya-a lut rih lo turin mipuite kan rawn a. Mi mal leh car tenau neitute chu miin an lo khawih duh bik bawk avangin zin rih lo tura ngen an ni,” tiin Guwahati Police Deputy Commissioner (East) Sudhakar Singh chuan PTI a hrilh.
Hetih lai hian sumdawng lirtheite bik erawh chu dan pangngaia an tlangtir zel thu a sawi.
PTI chuan Assam number plate intar car pakhat chu Meghalaya khawpui, Shillong-ah Thawhlehni zan khan hal a ni a, an hal hmain a tidingtute hian a chuangte chu chhuk turin an hrilh hmasa nia sawi a ni.
Taxi driver thenkhat, Thawhlehni zan leh Nilaini tuka Guwahati-a haw tumte chu Meghalaya Police-in Assam ramri thleng an hruai a; mahse, kawngah mi thenkhatin an lirtheite lungin an lo vawm tih an sawi.
Cachar Superintendent of Police Numal Mahatta pawhin Assam leh state dang atang pawhin, tlangram state atanga ngenna an dawn angin Meghalaya kaltlang chuan zin rih lo tura ngenna a tichhuak bawk.
“Meghalaya Police chuan buaina avang hian an state chhunga lirthei lut turte thunun a ngai tih an sawi a. Mipuite him zawk nan invenna kalpui a ni,” a ti.
Tar lan tawh angin Thawhlehni khaw var hma khan Assam-Meghalaya ramri buaina lai bawra buaina chhuakah Assam forest guard telin mi paruk kah hlum an ni a. He thil hi Assam forest guard-ten thing phur truck an lo man atanga intan a ni.
Meghalaya sorkar chuan district pasarihah mobile internet service titawp lailawk nghalin Assam Police pawhin ramri hrul district-ah venhimna khauh zawkin an kalpui nghal a, buaina chhuak chu high court judge chawl tawh kaihhruaina hnuaia chhui turin a ti bawk.
Meghalaya Chief Minister Conrad Sangma chuan Twitter-ah Prime Minister Narendra Modi, Union Home Minister Amit Shah leh Assam Chief Minister Himanta Sarma te tag-in Assam police leh forest guard-te chuan Meghalaya lutin silai an hmet puak niin a tar lang a. Sangma hi BJP sorkar nena thawkho lai an ni.
Assam Police thuneitute erawh truck hi anmahni huam chhung, West Karbi Anglong district-ah forest department team-in thing a phur hi an hmu tih an sawi a, Meghalaya atanga mipui pungkhawmin forest guard leh police-te beiin boruak thunun nan Assam lam hian silai an hmet puak ta mai niin an sawi ve thung.
Mukroh khua, West Jaintia Hills district-a silai hmeh puahnaa thi paruk zinga panga hi Meghalaya-a cheng niin Assam Forest guard pakhat a tel ve tih Sangma chuan a tar lang bawk.
Meghalaya chief minister hian an state mi thite chu Rs. Nuai 5 theuhva ral an nih tur thu a puang nghal a. Assam sorkar pawhin Rs. Nuai 5 bawk thi chhungte chu an pek tur thu an puang bawk.
Assam nena an inrina hrula buaina chhuak chungchangah hian Meghalaya minister-te chuan Ningani hian Union Home Minister Amit Shah an hmu dawn a, central agency chhuitir dan an dap dawn a. Assam sorkar pawhin thil thleng hicentral agency emaw, state pahnih mi leh sa ni lo (neutral) chhui tura an tih tur thu an sawi nghal bawk.
Assam-a Sarma sorkar chuan district SP an sawn nghal a, Jirikinding Police Station Officer-in-Charge leh Kheroni Forest Range-a Forest Protection Officer chu an hna atangin an chawlh lailawktir nghal bawk.
State pahnihte hi km 884.9 an inrina hrul hmun 12 zetah inrem lohna an nei a, heng hmun hrang hrangah hian buaina a lo chhuak tawh thin.
Kumin March thla khan hmarchhak state pahnihte hian New Delhi-ah Shah-a hriapuina hnuaiah an buaina zinga hmun ruk titawp turin memorandum of understanding an lo ziak tawh nghe nghe.