Aizawl : Serchhip District Hospital sakna tur chungchanga Serchhip Joint Action Committee (JAC) in Gauhati High Court, Mizoram Bench-a PIL a theh luh chu nimin khan ngaihtuah a ni a. Court chuan a hmun ngaia hospital hi sak ngei a ngaih thu a sawi.
Judge pahnih Justice Nelson Sailo leh Justice Marli Vankung te thutna Division Bench chuan hemi chungchang hi a ngaihtuah a, Serchhip District Hospital sakna tura Chief Minister hova May 27, 2022 a Memorandum of Understanding (MoU) ziahah leh Hospital Detailed Project Report (DPR)-ah a hmun ngaia sak tura tih a ni a, hemi tidanglama Bukpui a sak tur ang zawng hian sorkar in official-a hmalakna pakhatmah a la neih loh avangin, a hmun ngaia hospital hi sak ngei turah Court chuan a ngai tih an sawi a. Sorkar-in MoU leh DPR ang lo a hmundanga sak tuma hmalakna official-a a nei a nih phawt chuan, PIL theh lut nawn leh turin JAC ikil te zalenna (liberty) a pe.
Power Grid Corporation of India, Ltd. (PGCI) CSR Fund atangin Serchhip District Hospital sakna tur hian Rs. 21 crores hmuh a ni a. Hetih lai hian Serchhip Dist. NGO Co-Ordination Comtt. (NGOCC) ten Bukpui a sak an rawt thung. Mahse, September 26, 2022 a Serchhip DC hoa Joint Action Committee on Serchhip District Hospital Site-te leh Serchhip Dist. NGO Co-Ordination Comtt. te joint meeting-ah JAC te’n DPR leh May 27, 2022 a Chief Minister hoa PGCI Power Grid Corporation of India Ltd. leh Health Deptt. hotu te’ MoU an ziahah a hmun ngaia sak tura engkim ruahman a ni tih an sawifiah hnuah, NGOCC lam ten Bukpui chu Hospital sakna tura an duhna hmun ni mah se sorkar thutlukna apiang an pawm theih tur thu thuchhuah intawm an siam a.
Hetih lai hian, October 19, 2022 khan Mizoram sorkar-in Serchhip Dist. Hospital sakna tura thutlukna a la siam mai loh avangin JAC-te thutkhawm chuan Gauhati High Court-ah PIL theh luh mai nise tih an relin, October 21, 2022 khan Serchhip Kawnpui Village Council Hall-ah Serchhip khawchhunga VC hrang hrang leh NGO aiawh hrang hrang te Joint Meeting neihpuiin, PIL theh luh mai chu a hun tawh a ni tiin kalkhawmte hian ban pharin, PIL theh luh an duh thu an nemnghet a, hemi hnu hian Village Council hrang hrang leh mi mal thahnem ngai ten ukil rawihna atan pawisa thahnem tak an thawhkhawm nghal bawk a ni.
Serchhip JAC hruaitute chuan Gauhati High Court-in rang taka an thubuai ngaihtuahna hun a siamsak chu lawmawm an tih thu an sawi a. Sorkar hmalakna an thlir reng dawn tih sawiin, mipui mamawhna a san tawh avangin a rang thei ang bera Serchhip District Hospital building sa thuai turin Mizoram sorkar ngen nawn lehin, MoU leh DPR a inziak ang loa sorkarin hma a la a nih chuan High Court-in a phalsak angin PIL theh luh leh ngei an tum tih an sawi.