Chief minister, finance changtu ni bawk, Zoramthanga’n Reserve Bank of India-in list a tihchhuah thar berah Mizoram chu India hmarchhak state zingah Sikim tih lohah leiba nei tlem ber a nih thu a sawi.
He thu hi nimina a bial chhunga Zemabawk veng a tlawhnaah chief minister chuan a sawi a. Eptu party thenkhatin ‘leiba’ ngah lutuk ang leh state dang ai pawha leiba ngah uchuak tak anga mipui an fah thin chu tha a tih loh thu leh thu dik tak mipui hriattir chu tha a tih thu a sawi a, “RBI list tihchhuah thar berah Mizoram chu India hmarchhak zingah leiba nei tlem ber pahnihna a ni zawk,” a ti.
Zorama chuan chhim leh hmar, chhak leh thlangah inkalpawhna kawngpui lian tham tak tak hmalak mek a nih thu sawiin, Aizawl by-pass road leh leiverhte tih theih loha an sawi thin chungchang sawi bawkin, “Politics-a inchirhtheh nan thenkhatin hmang bawk mah se a tak ram a thleng chho ta,” a ti a. Hmathlir thui tak neih a tul thu sawiin thang lo thar leh zel turte tana hmathlir lo neih chu tihmakmawh a nih thu a sawi.
Chief minister chuan Hyderabad atanga Mizorama zin, Pastor Dr. P.J. Stephen Paul-a’n King James Version Bible a pek thu leh Stephen-a hian chief minister zingah Pathiana innghat chief minister a nih thu a hrilh tih a sawi a, “Pastor Stephen-a chuan Mizoram chu India ramah chanchin tha hril tura ruat an nih thu leh chumi tura inbuatsaih an ngaih thu min hrilh,” a ti.
MNF president chuan kum 2023-a MLA inthlanpui lo awm turah pawh an party-in sorkarna a chan leh ngei a rin thu sawiin, a bial mipui tan pawh malsawmna tam zawk a luan luh ngei a beisei thu leh Zemabawk veng mipuite, a bial mipuite pawhin a hnathawh avanga an vote leh ngei a beisei thu a sawi a ni.
Aizawl East I bialtu MLA hian a bial chhunga veng hrang hrangte a fang mek a, nimin khan Middle School Veng Welfare House-ah leh Zemabawk YMA Hall-ah te hun a hmang a ni.