Ministry of Home Affairs (MHA) chuan India rama mi sual, man a duh tak tak zinga ram danga awm mek list a tichhuak a. Heng mite zinga 28 chu tualthattu, mi thil chhuh luitu leh thubuai hrang hrang nei an ni.
Home ministry-in list a tihchhuahah hian Goldy Brar tia an koh bawk, Satinderjit Singh chu a chung berah awmin ani hi United States-ah a khawsa nia ngaih a ni.
Brar-a hi Lawrence Bishnoi nena nikuma Punjabi zaithiam, Sidhu Moosewala thattua ngaih an ni a. NIA chuan Landa tia an koh thin bawk, RPG hmanga Mohali leh Tarn Taran-a mite beitu, Babbar Khalsa International (BKI) operative Lakhbir Singh nen pawh inhmelhriat tha niin an hria.
List-a gangster lang zingah hian Bhanu tia an koh, Anmol Bishnoi pppawh a lang a, ani hi investigative agency-ten an man duh tak niin US-ah bawk a biru nia hriat a ni.
Bhanu-a hi vantlang leh sakhaw hruaitu, lemchan thiam, zai thiam leh sumdawngte beih dan tur ruahmanna siam thina puh a ni a. Pakistan nena inzawmna a neih piah lamah Canada, Nepal leh ram danga Khalistan lamtangte nen pawh inbe thin niin NIA chuan a sawi.
Moosewala thahnaa inhnamhnawih dang nia hriat, Sachin Thapan pawh list-ah hian a lang a. Janta tia an koh, Gurjant Singh, Romi Hong Kong leh mi dangte pawh an tel.
Gangster hming lang zingah Lucky Patyal tia an koh, Gaurav Patyal pawh a tel a, ani hi nikum khan a in leh a vel chu NIA-in an lo dap chiam tawh a; silai leh ruihhlo pawh an man a; mi that thin, mi thil chhuh lui thin, mi ru bo thin leh firfiaka chetna hrang hrang lo nei tawh thin a ni.