Newcastle United in English Football League Cup final a an tlawmna phuba an la a, Manchester United mikhualin 2-0 in an lo hneh.
Pathianni zanah St. James’ Park thawm a ring a, kuminah an chetthat em avangin England hmar lama khaw lian zinga tel club tantute an phur thar.
Magpies hian inkhel tan atangin tha takin an khel a. Thawhrimna leh tumruhna an lantir a, chak tum a khel zawk an ni tih team pahnih player-te chezia atangin a hriat.
First half-ah Manchester United goalkeeper David de Gea chuan save tha tak tak siamin Newcastle United goal khung tur a dansak nual a. Joe Willock bakah Alexander Isak te goal khung loh a uihawm.
Second half-ah erawh an hlawhtling a, United an insiamtha thei lo. Bruno Guimaraes ball cross chu Allan Saint-Maximin chuan tauh letin Willock-a’n goal-ah a ti lut.
First half a goal shot goal zawn a kal nei miah lo United in hlauhawm an siam tak tak thei lo. Second half tawp dawnah substitute Callum Wilson zawkin Newcastle United goal hnihna a tauh lut.
United leh Newcastle te hi an point hmuh an inang chiah a, goal difference-ah Magpies an sang zawk.
Newcastle manager Eddie Howe chuan, “Hnehna pawimawh a ni a, player te an kheltha kha a pawimawh lehzual.”
“Engtiklai mah khan kan beidawng duh miah lova, kan thawkrim bawk. Kan fitness tha hi vawiinah fak loh theih a ni lova, inkhel a rei khan kan tha tulh tulh.” tiin a sawi.