Omicron variant avanga khawvelin a buai vanglai a tawn mek laiin SARS-CoV-2 chu scientist-ten France chhim lamah a chi thar an hmuh chhuak leh.
‘IHU’ tia an sawi mai, B.1.640.2 variant tia an sawi hi IHU Mediterranee Infection-a zir chiangtuten an hmuh chhuah a ni a, mi 12 vel kai an awm tawh niin an sawi a. A intanna hi Africa khawmualpuia Cameroon ram nena inzawmna nei a ni.
Researcher-te chuan he variant thar hi eng anga inkai awl nge tih leh vaccine hman mekten an dang thei em tihte chu an la hre chiang thei lo.
An zir chian tawhna chinah chuan December 29 khan IHU an tih hi a hmasa ber hri atang khan chi 46 zetin he hri thar hi a insiam danglam tawh niin an sawi.
Tuna khawvelin vaccine a neih mekte hi SARS-CoV-2 hrikin spike protein a neih, mihring taksaa a intihtanna hi a bei ber.
B.1.640.2 hi ram dangah a kai hmuh an la ni lo va, World Health Organization (WHO) pawhin chhui zui tur zingah a la dah lo.
Zirchiangtute chuan a kai an hmuh hmasak ber hi puitling, RTPCR hmanga laboratory-a nasopharyngeal sample lak, November thla laihawla an lak a ni tih an sawi.
Epidemiologist Eric Feigl-Ding chuan variant tharte hi ngaihven an ngai tih a sawi a; mahse, a thar apiang hi hlauhawm an ni chuang lo va, hlauhawm anga en a tul ber lo niin Twitter-ah a tar lang.
Thawhlehni khan Feigl-Ding chuan, “Kan hriat lar leh hlauhawmte hi a hmasa ber hrik atanga vawi tam insiam danglam leh insiam danglam zel tura theihna nei sangte an ni,” tiin a tar lang.
“Omicron anga ‘variant ngaihven ngai’ a niha kan taksaa invenna a ei chhiat chak dan hriat hunah a thar pawh hi engnge a nih a chiang ang,” a ti.
Tunah hian khawvel ram tam takah COVID-19 kai an pung chak hle a. Hei hi nikum November thlaa South Africa leh Botswana-a a chi thar hmuh, Omicron vang a ni.
He variant hi ram 100 chuangah kai an awm tawh a. India ramah pawh state leh UT 23-ah mi 1,892-in an kai tawh.