Assam chuan Meghalaya nena ramria buaina an neih hmun 12 zinga parukah inremna nei tawhin tun thla tawpah inremna (memorandum of understanding) an ziak dawn niin Assam Chief minister Himanta Biswa Sarma chuan a sawi.
Sarma hian Nilainia Guwahati-a Meghalaya Chief Minister Conrad Sangma nena an inkawm zawhah an inrem tih hi a sawi.
“Vawiina kan sawinaah sorkar level-ah chuan inhriat thiam tawnna kan nei ta a. Tih dan pangngai angin state pahnih hian eptu party, zirlai pawl leh ramri chungchanga biak ngaite chu January 18 hian an be dawn a ni,” tiin Sarma chuan a sawi.
Nikum khan chief minister pahnihte hian ramri buai chu a tahtawla chinfel turin an ti a, hmun 12 zinga paruk chu tihfel hmasak phawt ni se an ti.
Hma an lakna parukte hi Tarabari, Gizang, Hahim, Boklapara, Khanapara-Pilangkata leh Ratacherra a ni a. Hengte hi Assam lama Kamrup, Kamrup (Metropolitan) leh Cachar district-a mite niin Meghalaya lamah West Khasi Hills, Ri Bhoi leh East Jaintia Hills district an ni thung.
State pahnih hian heng buaina theuhvah hian committee dinin hetah hian lehlam lehlama minister an tel a. Buaina hmunte hi an enho va, a bul vela mi leh biak tur dangte an bia a. Tun thla tir khan state pahnih sorkar hian Shillong-ah committee an dinten an thil hmuhte report an ngaithla.
“Sorkar pahnih ringawtin heng thil hi a tifel thei lo va, mi dangte nena inbiaka inrawn a ngai a. Tun thla chhungin inremna erawh kan ziah theih ngei ka beisei,” tiin Sarma chuan a sawi.
Meghalaya Deputy Chief Minister Prestone Tynsong pawh Nilainia an inkawmnaah hian a tel a, ni hnih thum hnuah chief minister-te hi an inkawm leh dawn a, chumi hnuah Union Home Minister Amit Shah pawh an kawm dawn tih a sawi.
“January 21 (Meghalaya-in state a nih kum 50-na) hmain inremna neia vantlang hriata kan puan theih ngei kan inbeisei,” a ti bawk.