Governor Hari Babu Kambhampati chuan nimin khan Lunglei leh Tlabung inkar kawngpui siam thar hna thawktu, National Highways & Infrastructure Development Corporation Limited (NHIDCL) hnuaia contractor pakhat, M/s SRK Constructions & Projects Pvt.Ltd, Hyderabad hotute kawmin chak zawka hna thawh dan tur leh siam zawh hma dan tur a sawipui.
Governor chuan Lunglei thlang lama cheng mipuite tan siam zawh a nih hun chuan kawngpui avanga harsatna an tawh thinte sutkian a ni dawn tih a sawi a, “Tlabung leh Chittagong inthlunzawm hunah phei chuan Mizoram tan sumdawnna kawngpui pawimawh tak leh hmasawnna thlentu a ni dawn a ni,” a ti.
Kawngpui siam hna thawktute chu an harsatna leh chak zawka hna an thawh theih dan turte zawtin a tul anga hmalakpui a tum thu a hrilh bawk.
S. Lallit Sanjeeva Reddy, Managing Director, M/s SRK Constructions & Projects Pvt Ltd chuan tuna kawngpui awm mek, km 95 atangin km 75-a thuiah kawng chu siam tum a ni tih a sawi a. Kawng zau leh tha zawk siam tumin theihtawp an chhuah thu a sawi ve bawk.