Assam Chief Minister Himanta Biswa Sarma chuan an thenawm, Meghalaya nena ramria an buaina chu chin fel a nih theih nan ruahmanna siam mek a nih thu a sawi a. Hei hi state pahnih aiawhte telna committee pathum an dinin an en fel dan azira tih a nih thu Thawhlehni khan a sawi.
Sarma chuan Thawhlehni han hemi chungchangah hian all-party meet koh a nih thu leh party hrang hrang aiawhte nen an sawiho thu Twitter-ah a tar lang.
State Guest House , Koinadhara-a thutkhawmah hian minister pahnih, Ranoj Pegu leh Ashok Singhal bakah assembly-a eptu hruaitu, Debabrata Saikia pawh an tel.
Sarma chuan chief minister level-a vawi tam inbiakna an kalpui hnuah thuneituten tun hi an thlenpui ta tih a tar lang bawk.
“Assam-Meghalaya ramri buaina chin fel tuma hmalakna chuan rah tha chhuahin hmun 12-a buaina awma hmun ruk chu a thawh khat nana ching fel turin hmalak phawt a ni a. Tuna tihfel mai tura kan tihte hi Hahim, Gizang, Tarabari, Boklapara, Khanapara-Pillingkata leh Ratacherra-a mite a ni,” tiin Twitter-ah hian a tar lang.
Hun rei tak ata tawh state ramri buaina an neih chin felna tur hian state pahnih chief minister-te hi December 23 khan inkawmin hma lak dan tur an sawi a. Hmun 12-a buaina an neih mekah hmun ruk tifel hmasa phawt turin an inrem.