Aizawl: ZPM Vice President Dr. Kenneth Chawngliana chuan ZPM party-in kumin MLA inthlanpui atan budget insiam mah se, khawi atang mahin lak luhna a nei bik chuang lo niin a sawi.
Zirtawpnia ZPM pisa-a an party chhung inkhawmah thu sawiin Dr Kenneth Chawngliana chuan, pawisa hi inthlanaah chuan a pawimawh tih a sawi a. MLA inthlanpui neihah an party-ah budget a tlem hle tih sawiin, “Sum ngaihtuahtu tur kan inruat a, budget te han siam ve mah se, khawi atang maha lak luhna an nei bik chuang lo va. Party dangte MLA pakhat senso hi kan candidate zawng zawng hian an hmang tling lo hial a ni,” a ti.
Dr Kenneth Chawngliana chuan MLA inthlanpui atana sum hman tur chu vairama company lian tam tak atangin sum hmanga an puih theih turin ZPM chu sawm nasa viau mah se, an hotuten a hnu leh beiseia sum theh chhuah inhuam an nih avangin rethei hle mah se hnawl ngam tura an tih avangin an hnawl vek niin a sawi.
Tuna a lan dan chuan ZPM hian party dangte thawhpui nei loa a mala sorkarna an siam dawn nia sawiin ZPM Vice President chuan, “Tun hma kha chuan unit pawh nei mang lovin candidate-te kan han nei a; mahse, khati zat MLA a an tling thei te kha a ropui a. Tunah erawh chuan party a zawnga unit ngah ber kan ni ta te hi a lawmawm em em a ni,” a ti.