Aizawl: Tun dinhmunah Myanmar atanga Mizoram chhung, Zokhawthara sahimna zawnga raltlan mi 6,201 an awm mek.
Mizoram sorkara Home Commissioner-in tun hnaia ramria Myanmar sipai leh mipui sipai inbeihna avanga Mizoram chhung, Zokhawthara sahimna zawnga raltlan awmte chhinchhiah fel tura Champhai district thuneitute a hriattir angin, ni hnih chhungin District Level Committee on Myanmar Refugee leh Village Level Committee on Myanmar Refugee (VLCMR), Zokhawthar te chuan raltlan chhiar beihpui an nei.
Zokhawthara raltlan chhiar beihpui an neiha chhinchhiah a nih danin, raltlan camp-ah hian mipa 976 leh hmeichhia 992 bakah, kum 18 hnuai lam mi 1,322, an vaiin mi 3,290 an awm mek a ni.
Raltlan camp-a awm lo mahni chhungte bel leh in luaha awm, mipa 885 leh hmeichhia 966 bakah, kum 18 hnuai lam mi 1060, an vaiin mi 2911 an awm mek bawk a. He’ng zawng zawngte nen tun dinhmunah raltlan hi mi 6,201 an awm mek a ni.
Myanmar sipai leh mipui sipai inbeihna avanga Zokhawthara sahimna zawnga tlan chhia, mahni khaw lama la let leh lo mi, mipa 277 leh hmeichhia 312 bakah, kum 18 hnuai lam mi 416 an awm mek bawk.
District Level Committee on Myanmar Refugee chhinchhiah danin, tun dinhmunah Champhai district chhungah raltlan 12,516 an awm mek a ni.