Dallas Mavericks in NBA a offense nei hlauhawm ber team zinga mi an nihna lantirin Utah Jazz an sawp a, 147-97 in Ningani zingah an chak.
American Airlines Center-ah Mavericks hian an mikhualte hi inkhel tan tir atang an ngam viau a. Star player Luka Doncic chuan first half-ah triple-double a nei a. Quarter thum chauh an khelhtir chungin point 40, rebound 11 leh assist 10 a nei.
Doncic hian 3 points vawi 12 atang vawi 6 a lut a, NBA-ah triple double vawi 60 a neihna niin NBA legend Larry Bird a khum a, NBA chanchin a triple double nei hnem pakuana a ni mek.
“Ka lawm a, han sawi vak ngaihna pawh ka hre lo. Larry Bird chu tunge a nih kan hre vek a, chuvang chuan hetiang dinhmun ka thleng thei hi ka tan chuan thil ropui tak a ni.” a ti.
Mavericks tan Kyrie Irving chuan point 26 leh assist vawi li a nei a. Bench atang Tim Hardaway Jr. chuan point 17 a thawh.
Inkhel dangah Western Conference a league hmahruaitu Minnesota Timberwolves in 102-94 in San Antonio Spurs an hneh a. A zawnin vawi nga an chakna a ni a, vawi 20 khelh atang vawi 16 an chak tawh.