Aizawl: Synod inkhawmpui neih mek chuan Mizoram Presbyterian Kohhran inkhawm tihtlem a ni dawn lo tih nimin khan a tichiang.
Mission Veng Kohhran Biak Ina Synod Inkhawmpui neih mekah nimin khan rorel inkhawm ni thumna neih a ni a, ‘Inkhawm tihtlem chungchanga zir chianna leh Presbytery ngaihdan khaikhawmna’ ngaihthlak a ni a, zir chiangtute rawtna siam leh presbytery ngaihdan angin kal dan ngaia kal chu kan tih tur a ni e, tih a ni.
Rorel inkhawmah hian agenda 17 sawihoin, an thu pawm zingah chuan Aizawl East Presbytery atanga lut, ‘Anpui inkawp (same sex marriage) a bo theih nana hma lak’ rawtna chu sawihoin Synod hmalak mekna a nih thute sawi fiah a ni a, kohhran tinah hma lak chhunzawm zel ni rawh se, tih a ni a. Aizawl Hmar Presbytery atanga lo lut, ‘Lehkhabu tha chhiara hma kan sâwn theih nan hma lak’ rawtna chu pawmin, SEC bawh zui tura dah a ni.
Champhai North Presbytery atanga lut, ‘Contract hna hralh chungchang’ chu sawihoin kohhran duh loh zawng a nih thute sawiin, SEC hmalakna turah dah a ni a, Chhimphei Presbytery atanga lut, ‘Chhungkaw harsate khai chhuak zâwnga tun aia nasaa hma lak’ rawtna chu SEC-in chak zawkin hma lo la rawh se, tih a ni a, ‘Pem Upa thlan nawnte certificate pek’ rawtna, Kolasib Presbytery atanga rawtna chu rem tih a ni a, SEC bawh zui tura tih a ni.
Heng bakah hian ‘Fa lak (adoption) chungchanga zirtirna siam’ rawtna Aizawl West I Presbytery atanga lut chu tha tih a ni a, SEC bawhzui tura dah a ni a, ‘Chhungkaw kehchhia kan pun zel loh nan hma lak’ rawtna, Aizawl Bethel Presbytery atanga lut chu tha tih a ni a, SEC-in hma lo la rawh se tih a ni a, ‘Zirlaite hnena scholarship, stipend leh pocket money pêk dân en that’ rawtna, Aizawl Chhim Presbytery atanga lut chu hman nghal turin SEC-in lo en tha rawh se, tih a ni a, heng bakah hian kohhran kaihhnawih thil dangte pawh rel a ni.