Aizawl: Mizoram Legislative Assembly pakuana session hmasa ber, ni thum awh tur chu naktuk chawhma dar 10:30-ah neih a ni dawn a, speaker tur atan hming pe lut an la awm lo.
Assembly secetariat hotuten an sawi danin assembly pakuana speaker tur thlanna neih tur atan hian December 11, Thawhtanni tlai dar 3:30 thleng hming a thehluh theih a, Inrinni thleng khan chuh tura hming pe lut an la awm lo a ni.
Assembly pakuana session hmasa ber hi Thawhlehni chawhma dar 10:30-ah tanin Protem Speaker Lalfamkima’n a kaihruai ang a, member thlan tharte rinawmna thu tiamtirin assembly member atan lak luh an ni ang a, chumi hnuah speaker tur thlan a ni ang.
Atuk, Nilainiah session hi neih chhunzawm leh a ni ang a, dan pangngaiin Governor Dr. Hari Babu Khambampati chuan thu a sawi ang.
Session ni tawp ber hun hmasa lamah session hmasa leh tun session inkara MLA thi sunna hun hman a ni ang a, chumi hnuah deputy speaker tur thlan a ni leh ang.
Dan pangngaiah sorkarna siamtu party-te chuan session neih tan a nih hmain speaker thlannaa chuh tur hi an inruat hmasa thin a, ZPM Legislature Party erawh chuan speaker tur hi an la thlang fel rih lo.