Liverpool in player 10 a inkhel tawp lam hmang Crystal Palace lakah ‘comeback’ hnehna an chang a, 2-1 a chakin Premier League table chung berah an inhlangkai.
Inrinni zana Selhurst Park-ah Liverpool tan hian Mohamed Salah chuan goal khungin club tana a goal 200-na chiah a ni a. Liverpool chanchina hetiang ti thei player pangana chauh niin Ian Rush, Roger Hunt, Gordon Hodgson leh Billy Liddell te hnung a zui.
Salah hian minute 76-naah goal khungin huntawp dawn hun pek belh minute 10 chhungin Harvey Elliot chuan an chakna goal a khung leh a ni.
Crystal Palace hian Jarell Quansah penalty chawi atangin Jean-Philippe Mateta kaltlangin goal an khung a. An forward Jordan Ayew chu second half a goal an chhuah hma lawkin yellow card a hmuh nawn avangin hnawhchhuah a ni.
Liverpool boss Jurgen Klopp chuan, “Minute 76 chhung kha chu kan khelchhe hle. Inkhel tan tirah kha chuan Crystal Palace kha kan lakah an zam tih a lang a, mahse kha kha remchang a la tur kan ni a, kan thei lo.”
“Red card an hmuh hnu lawka goal kan khung khan nasa takin min pui a ni.” tiin a sawi.
- Inkhel dang
Season tha hmang mek Aston Villa in point hnih chauh a hmahruaitu hlat turin Arsenal 1-0 in an hneh.
Villa Park-ah Villa tan captain John McGinn chuan minute 7-naah Leon Bailey cross atangin goal a khung a. Arsenal hian na takin nawrin huntawp dawnah goal khung mahse goal a pawm a ni lo.
Chelsea an hneh avanga phur tak Manchester United in Bournemouth lakah chesual in 3-0 in result duhawm lo an nei.
Old Trafford-ah Cherries tan striker Dominic Solanke chuan goal a khung hnuah second half-ah Philip Billing leh Marcos Senesi ten mikhual team tan hian goal an khung belh leh bawk.