Khawvela baseball inelna league lian Major League Baseball star Shohei Ohtani chuan hun engemaw chen free agent nia hun a hman hnuah team thar a zawm a. Los Angeles Dodgers hnenah kum 10 contract ziakin baseball chanchin a player hlawh hnem ber a ni ang.
Ohtani hian Dodgers hnenah hian kum 10 contract, Dollar maktaduai 700 manhu a ziak a. Hei hi MLB chanchin a contract lian ber niin North America a infiamna hovah kum khata player hlawh hnem ber a ni dawn.
Kum 29 mi Ohtani hi tunlaia MLB player tha bera tam tak ngaih a ni a, ball vuak leh a vawm a MLB chanchin a tha berte elpha a khelh theih ve ve avangin baseball khelhdan a nghawng danglam ni hial a sawi a ni thin.
Kuminah Los Angeles Angels a kum ruk contract a ziah a hman zawh hnuah free agent a nih tur thu hi a lo sawi tawh a. Ngaihventu a neih hnem zingah Dodgers a thlang.