MNF President Zoramthanga chuan kum tharah MNF chu siam that ngai zawng zawng an siam tha dawn tih nimina MNF pisa, Hnam Rûna chhung inkhawmah a sawi.
Zorama chuan, “MNF hi kum tharah kan insiam tha vek dawn, a siam that ngai zawng zawng kan siam tha ang a, rawtna zawng zawng pawh kan ngaithla vek ang,” a ti a. MLA inthlanpui neih zawh takah an chak loh avangin Zoram hmun hrang hranga an party worker-te zam mai lo tura ngenin, rilru thar nen tan lak theuh a pawimawh tih a sawi a, Pathian remruat chu dan zawh rual a ni lo tih te, ZPM sorkar turin Pathianin rem a ruat a ni tih chu pawm thiam a tul tih a sawi a. MNF party atangin MLA 10 lai Pathianin a pe hi chu lawmawm an tih thu sawiin, “Hlawhtling lo zawkah tang mah ila, tun inthlan result hi kan thatna tur zawka Pathian remruat a ni tih kan pawm a ni,” a ti.
MNF party chhung inkhawmah hian MNF Legislature Party Leader Lalchhandama Ralte, Tuivawl bialtu MLA pawhin thu sawiin, kumin inthlanpuiah hnehna chang zo ta lo mah se Pathian zarah an tho kang leh ngei dawn tih a sawi a, 9th Mizoram Legislative Assambly-a Zoram kal leh zel an relna turah Zoram mipuite leh an hotute support-na an mamawh hle dawn tih a sawi a, theihtawpa thurawn pek a mamawh thu a sawi a ni.
Inkhawm hi MNF Vice President Vanlalzawma’n a kaihruai a, MNF MLA tling tharte chawimawima hun buatsaih a ni a, Mizo National Women Front hruaituten lawmpuina pangpar an hlan a ni.