United States-a Texas-a vur tlain kawng a tihnal avanga state inkalpawhna kawngpuia lirthei thahnem tak insu-ah mi panga vel an thi.
Lirthei insutna thlengah hian lirthei 75 atanga 100 vel an tel thu police chuan an sawi a. Thlasik khaw vawt takah US-ah hian ram pum deuhthawhah ruah a sur a, vur a tla bawk a, kawngpui a nal hle.
Hliam tuar zat pawh hriat theih a la ni lo va, police-te chuan Fort Worth chuan hnuai lama Interstate 35-ah chhiatna hi a thleng tih an sawi.
Police hian reunification centre siamin hetah hian chhiatna thleng avanga chhungte inhloh inhriattir turin an ngen.
I-35 hi mi 75,00,000 chuang chenna, Dallas-Forth Worth metroplex tan tlang interstate highways tam tak zinga pakhat a ni.
Fort Worth Police Department chuan Twitter-ah lirthei insua tel ve, na lem lote chu inhriattira an kalna tur lam pan zui turin an ngen a, an tum ram an thlen hunah inhriattir turin an ti thung.
Helai hmuna lirthei thahnem tak insu bakah hian a bul hnai hmun dangah pawh vur tlain kawng a tihnal avanga chetsualna thleng a awm nual.
ABC News hnuaia mi, WFAA chuan metroplex-a chhiatna thleng zawng zawngah mi pariat an thih thu a tar lang a. Heng zingah hian Dallas leh Arlington-a lirthei chetsualnaa thite pawh an tel tih an puang.
Chhim lam hret, Austin-ah pawh vur tla avanga kawng nal lutukah lirthei che sawn thei lo thahnem tak an tang a. Mi pakhatin hliam a tawrh phah bawk.
Khawchin zirtute chuan Arkansas atanga Kentucky thlengin vur a tla dawn niin an la sawi lawk a, thlasik thliin Mid-Atlantic state an tihah vur a thlen dawn bawk niin National Weather Service chuan a sawi lawk.
Ningani tukah khan chhungkua leh sumdawnna hmun 1,25,000 chuangin electric an nei lo va, a tam ber hi Kentucky leh West Virginia-a mite an nih thu PowerOutage.US chuan an website-ah an tar lang.
Kentucky lailiah chuan thuneituten mipuite chu pawn chhuak tam lo turin an ngen bawk.
Kentucky Governor Andy Beshear chuan an state sorkar pisate chu khaw awm danin a zir loh avangin chawlh a puang a. Emergency puang bawkin thawktuten zalen taka mipui ngai puih hna leh kawng then hna te, power line chhia siam nante hun an hmang ang.
Hnathawktute chuan hmun tam takah vurin thing kung a bawh nasat lutuk avanga thing tluin power line chhia report an dawng hnem hle.
Dallas-Forth Worth-a Fox 4 News chuan Nilaini thleng hian khua hi vur tlakna khawpin a la vawt dawn niin an la puang bawk.