Kartawp khan Europe a league lian zual panga khelh chhunzawm a ni a, football-ah hnuhma thar eng emaw zat hmuh tur a awm. Kar tawpa football hnuhma langsar zual kan thlir kual leh thuak thuak ang.
- English Premier League
Zirtawp zana Championship khelhah Leeds United chu QPR lakah si li faiin an tlawm. Leeds an tlawm vangin Leicester City chu EPL-ah an kaisang dawn tih a chiang nghal. Season khat championship lama hun an hman hnuin Foxes hi EPL-ah an kir leh nghal dawn.
EPL-ah Leicester City an kir laiin Sheffield United erawh chu championship lamah an tlahniam ve thung. Sheffield hi EPL atanga an tlakhniam vawi lina a ni a, an mahni aia tlahniam tamte chu Norwich City (6) leh West Brom te chauh an ni.
Nilai zan khan Arsenal chuan an mikhual Chelsea chu 5-0 ngawtin an sawp. Chelsea hi London-a an elpui liante lakah si thum aia tamin an tlawm khat viau a, Arsenal lakah hian kum 1930 khan 5-1 in an lo tlawm tawh a. Hemi hnu lamah London khuaa an elpui lian lakah an tlawm chian leh ber tum a ni.
An muala Liverpool an hmachhawn tumin Everton chu vawi 12 ngawt chak lo zawn tawh a, club pakhat laka an chak loh zawn rei ber tum a ni. Vawi 12 ngawt an hneh loh zawh tawh Liverpool hi 2-0 in lo hneh a, an chak ve ta nge nge.
Everton hian EPL season kal meka goal an thun 36 atanga goal 17 (47%) chu set piece atanga an thun a ni a, season kal mekah an mahni aia set piece atanga goal thun tam awmchhun chu goal 20 thun Arsenal chiah an ni.
Pathianni zana Tottenham an hneh tum khan Mikel Arteta chuan EPL-ah Arsenal vawi 100 a chak tlinpui chiah. Arsenal manager zingah EPL-a vawi 100 chakpui rang ber a ni.
Manchester City midfielder ropui Kevin de Bruyne chuan EPL-ah assist vawi 110 a nei tling tawh a, EPL-a assist nei tam pathumna niin a chungah hian Cesc Fabregas (111) leh Ryan Giggs (162) te an awm.
- Spanish LaLiga
Luka Modric chuan Real Madrid tan vawi 527 a khel tling tawh a, Real Madrid tan inelna hrang hranga khelh tam lamah Roberto Carlos khelh zat a tluk a. Real Madrid tana khel tam 14-na a ni thung.
- German Bundesliga
Lois Openda chuan season kal mekah goal 24 a thun tling tawh a, Bundesliga season khatnaa goal thun hnem pathumna a ni a. A chungah hian Harry Kane leh Uwe Seeler te chiah an awm.
Harry Kane hian season kal mekah goa 36 zet a thun tawh a. English player zingah season khata goal thun hnem ber a ni a, Jimmy Greaves goal 35 a khum fel tawh. .
- French Ligue 1
Paris St-Germain chu a zawna a vawi thum nan an champion chiang ta a, season hnuhnung vawi 12-ah vawi 10 an champion na a ni.
PSG forward Kylian Mbappe chuan season kal mekah goal 25 a thun tling tawh a, Carlos Bianchi hnu lamah Ligue 1-ah season li chhunga goal 25 chin chung lam thun zawn thei hmasa ber a ni. Mbappe hian PSG tan league goal 254 a thun tling tawh a, Roger Courtois record khumin French football-ah club pakhat tana goal thun hnem ber a ni.
- Messi-Ronaldo
Inter Miami tan Lionel Messi a khel tha tluang viau a, khelh ruk chhung goal a thun zawn tawh. Messi hian season kal mekah khelh 10 atangin goal 11 a thun a, asssit vawi riat a nei tawh bawk. Messi a vul laiin Cristiano Ronaldo thawm a dai thung.