Bollywood actress lar Ravenna Tandon leh a driver te chu Mumbai-a an chenna In bulah mipui thinrimin tharum hmanga nawr buai an nih hnu-ah Police te an pahnih hian an rui lo niin, an sawi.
An buai dan video hi social media-ah a darh nasa hle a, an sut ngei nia hriat te lungawi lo chuan an hual a, inhnial buaina chhuakin, boruak a chhe viau hman nghe nghe.
Tandon hian mipuite chu an mahni bei lova, chhuah turin a ngen mawlh mawlh a, a hmuna awmte chuan he thil thlen lai hian actress hi a rui ah an puh.
Mumbai police te erawh chuan CCTV footage leh thil thlen dan uluk taka an zirchian hnu ah driver hian lirthei a back luh laiin, chhungkaw pakhatin kawng an lo kan ve mek bawk a, hemi te lungawi lo chuan ‘Motor back dawn reng rengin mi veivak an awm leh awm loh en hmasa tura’ driver an hrilh atangin inhnial buaina a thleng zui ta a ni.
DCP sawi danin, inhnialna atangin tawngkam mawi lo tak taka ankhumna in a zui nghal a, Tandon hian driver chhan a tumna lamah amah ngei pawhin an bitum zui nghal bawk.
He thil thleng hian mi tumahin hliam an tuar lo na a, social media-ah video a darh nasat em vangin tunah pawh hian thu inchuh a la nasa angreng hle.