Sorkarin Covid-19 laka mipui himna tura inkaihhruaina siamte Aizawl New Market leh a chhehvelah mipuiin an zawm that leh that loh Commerce & Industries-a Commissioner & Secretary Esther Lalruatkimi’n nimin khan a enfiah.
Mizoram chhunga ni khata mihring punkhawm tamna thin berna, Aizawl New Market enfiahtu, Esther Lalruatkimi chuan Aizawl New Market chhunga hri leng dona kawnga dan hrang hrang kenkawh a nih dan chu lawmawm a tih thu sawiin, veng neitu, Dawrpui khawtlang bakah local council-in bazar hmuna hri leng dona kawnga hma an lakna chu tha a tih thu a sawi.
Sorkarin hri leng laka mipui an himna tur atana SOP a siam, Aizawl New Market a hman dan chu siam rem tha a tih thu sawiin, New Market hotuten an duh dan an thlen chu thuneitu sang lamah thlen a tum thu a sawi bawk.
Commerce & Industries Addl. Director HD Lalrintluanga sawi danin, zing dar 6 atangin tlai lam dar 6 thlengin thawktuten ngawrh takin bazar chhung an fangkual thin a, hmaituamna hmang tha lo hnenah hmaituam tha turin an hrilh thin.
Sorkarin SOP thar ber a tihchhuah atangin Aizawl New Market chhunga tlai lama man man zawka in-sale thin mi 200 vel awm thin chu nasa takin thlitfim an ni a. Thawhtanni, Nilaini, Zirtawpni bikah second hand sale thin a ni.
Thawhlehni, Ningani, Inrinniah chawhmeh sale turin ruahmanna kalpui a ni a. Second hand sale thin mi 49 leh chawhmeh sale-a ei zawng mi 60 vel an awm.
Aizawl New Market chhunga dawr nghaktute chu hri leng laka an him thu sorkar hotute hi an lo hrilh a, Mizoramin Covid-19 third wave a tawrh hnuah hri kai an awm awm a hriat loh thu leh bazar atanga hri kai darh an hriat loh thu a sawi lang bawk.