India rama mihring cheng an tam berna state, Uttar Pradesh-ah chuan assembly inthlan thawh sarih an neih turah Ningani khan thawh khatna an zo va. He inthlan hian ngaihven a hlawh a, Prime Minister Narendra Modi-a leh Hindu nationalist BJP dinhmun pho langtu tura ngaih a ni.
Mihring maktaduai 200 chuang chenna, India hmar lama Uttar Pradesh hi BJP thatna a ni a, Hindu nationalist rilru innghahna pawh nia chhal thin niin sakhaw zuitu tlem zawk, a bikin Muslim-te tawrhna pawh a tamna hmun a ni.
Ngaihdan (opinion poll) thenkhatah chuan thuneihna an chelh mek chu chelh chhunzawm tura ngaih an ni a. He state-a hnehna an chang leh a nih chuan kum 2024-a parliament inthlanah pawh a zawna a vawi thum nana chak an hnaih sawtna ni tura ngaih a ni.
“Mipuiin sorkar tha an duh a nih chuan vote an thlak tur a ni,” tiin kum 41 mi, Acharya Udit Narayan Diwedi chuan Reuters news agency a hrilh a, BJP a vote tih a sawi bawk.
Hetih lai hian Uttar Pradesh-a chak loh emaw, an thunun lai, February-a inthlang ve tho state pahniha an chak lo a nih chuan BJP tan kum 2024 inthlan hi a khirh sauh tura ngaih a ni.
BJP hian tun hnaiah an hruai lawk tak takte chu Samajwadi Party lakah an chân a, heng mite hian a hnam ang zawngin vote tam tak la thei niin a bikin Muslim-te vote an la nasa zual thin.
Vote thlak thin zinga an hawi lamin nghawng nei tak, lo neitu an la awm a. Modi-a sorkar hian dan thar a siam a; mahse, lo neitute chuan duh lovin nasa takin duh lohna pawh kum khat vel an lantir a. Modi-a sorkar pawh tlawm zawkah tangin November khan dan siamte chu a hnuk kir.
BJP sorkar hi Uttar Pradesh-ah hian COVID-19 hripui leng a hmachhawn danah pawh sawisel a hlawh a. Nikuma hri kai an pun vak leh Ganges luia ruang eng emaw zat chhar a nite chuan hripui a beih danah duh khawp lohna a awm.
Uttar Pradesh-a BJP sorkar hian hmasawnna ruhrel lian tak tak din leh thawh mek an nei tih an sawi a. Heng zingah hian thlawhna tumhmun leh kawngpuite pawh a tel a. Hengte hian hna a siam dawn nia sawiin Hindu temple sak an tum bawk.
Hmasawnna ruhrel lian din tum pawh sawisel tawk an awm tho va, hna nei lo leh mi rethei tamna ber state-a hetiang lama sum sen chian chiam chu tha ti lo an awm teuh a ni.
Uttar Pradesh-a inthlan thawh sarih hi March 7-ah a hnuhnung ber neih a ni ang a, March 10-ah vote tlate chhiar a ni ang.