- Ramhluna Hnamte
Mizoram a College upa ber dawttu Lunglei Govt. College chuan September ni 10, 2025 ( Thawhlehni) hian a kum 60-na, Diamond Jubilee a thleng ta. April ni 21,1980(Thawhtanni) chawhma lamah kum 25 zet Pathian hruai a ka hna thawhna tur Lunglei Govt College ah chuan joining report ka pe a. Hetih lai hian mahni khua mah ni se hmelhriat neilo, tlangval kum 25 mi, zakzum angreng tak kha ka la ni ve a. Khatih hun lai a Science Lab. Demonstrator hna chelh mek Pu C.B.Thansanga(L) in min hruai a, min ti tlangnel a, ka lawm tak zet a ni. January thla a lo zawm thar Pu C.Zorema(L), ka junior pui a lo awm bawk a, ka tlangnel ve chu a ni nghal mai. Science faculty bikah chuan P.U.Science chauh kha kan la zirtir a, kan hahdam ang reng viau. Zoology Department ka enkawl a, keimah chauh ka ni a, Head & Tail of the Department ka ni deuh ber. Keimah hian he department hi ka enkawl rei viau mai. Kum engemawti hnuah BSc te introduce a lo nih ve tak hnuah chuan han mal khalh reng theih ni heklo, sorkarin zirtirtu dang min rawn pek belh ta a, tlem chuan hah a dam ta deuh.
Zoology tih leh Geology tih hi a lam dan a in ang deuh lek lek a. Zoology lecturer, guest lecturer ang tur tal a thawk tur kan duh thu kan than a, a rawn chhangtu awmchhun chu kan han belchiang a, BSc(Geology) a lo ni a! Midang awm chuang hek lo, khatih lai a kan Principal chuan lak mai a rawt a, kan la ta mai a. A ni Geologist nen hian hun reife chu Zoology class kan la dun ta a nih kha. Khatih lai a kan student ho khan an passed ve tho a, vawiin a hna tha tak tak thawk ta te pawh an awm a nia.
Khawhar tak a hun rei tak ka mal thawh hnuah Aizawl nula fel tak, Miss Lalzahawmi Chenkual in min rawn thawh pui ta a, ka lawm ngei mai. A ni hi chu appointment ngat a rawn thawk a ni a, Lunglei Govt College chu a ta ang chiah a enin thahnem ngai em em in a thawk ta a, a chhuanawm ngei mai. A ni nen hian Students Study tour te kan hruai dun thin a, khanglai hun kha chuan sum leh pai ah tunlai hun ang hian sorkarah harsatna lutuk a la tamlo bawk a, Gauhati Zoo leh Shillong Botanical garden te bakah Cherrapunjee leh a bul a puk hmingthangte pawh kan students te vawi engemaw zat kan tlawhpui thei a ni. Miss Lalzahawmi (tunah chuan Dr.Lalzahawmi Chenkual) rawn thawh ve hnu hian Zoology honours class te hawn a lo ni ve chho ta a, Miss Vanthangpuii rawn thawk ve leh in a hnuah Pu R.Lalrochama, Pu Lalthangliana leh Pi H.Lalhmangaihzuali te an rawn luh belh leh a. Miss Vanthangpuii te rawn luh hma lawk hian Miss Thangrimawii leh Pu Lalramdina te pawh an lo thawk bawk. Anni pahnih leh Miss Lalzahawmi te hian Aizawlah min insawn san leh ta a ni. Hun rei tak keimah chauh a ka lo enkawl thin Zoology Department chu lecturer 5 lai awmna, University norms anga zirtirtu nei kan lo ni ta a ni.
HLIMLAI NI : Ka thawh tirh laite kha chuan keima thahnem ngaihna in Lunglei khaw chhehvel ah ka students te local field trip ka neih pui thin a, pawisa thawhkhawm in chawte kan fun a, rannung leh thlaite kan ‘collect’ thin a, chungte chu tawihtheihlohna hlo ah kan chiah a, khang hun lai a kan ‘collect’ te kha vawiin thleng hian Zoology Dept. museum ah a la awm hlawm a ni. Local field trip ah hian Hmawngva, Mat leh Khawiva ah te kan kal thin deuh ber. Mat kan kal tum hian Tuipui Balu phur tur truck-ah kan chuang a, Mat chu hma takah kan thleng a, rannung leh thlai lam collection kan han nei a, kan collection pawh hemi tum hian a tha khawp mai. Khami tum a kan specimen collect ho kha chu a hlu bik riau in ka hre thin. Kan collect zinga ka la hriat reng chu Mat lui kam a tit (Scolopendra) lian chung chuang tak kan collect kha a ni. Zoology museumah khan la vawng tha tak maw.
Khatia students te local field trip ka neih pui thin kha an lo hlawk pui in an lo phur phah em em a ni tih tunhnuah ka hre thar fo a, chhunzawm theih zel pawh a that vei nen, kan thawk rei tial tial a, tan mar pat reng hi chu thil har tak a lo ni a, kan chhunzawm hlei thei ta lo a ni. Local field trip hi a hlawk a, tuna science lecturer la thalai deuhte hi chuan kum khata vawi khat tal chu hetiang trip hi han neih pui thei thin se, a tha ngawt mai.
Lunglei Govt College hi kei chuan ka theihnghilh ngai tawh dawn lova, ka sorkar hnathawhna hmasa ber, kum 25 zet hun ka hmanna, ka that lai hun leh vanglai hun ka hmanna a ni a, mumang lamah pawh kan mang bang theilo a nih ber hi. Thiam leh thiamlo a carrom board kan khelh ve thin lai a tawng thar kan chher chhuah nasat zia te, a hnu deuhah playing card khelh kan atchilh lai, thian thenkhatte phei chuan an addict hneh tawh luattuk avanga holiday hreawm an tih theih zia te kha aw…., sawi tur a va tam ve.
Khatih lai khan, 2004 a, kan Directorate a Joint Director hna a chelh laia min boral san ta Pu C.Zorema nen khan a junior ber kan ni a, tlangval kan la ni bawk a, kan in zui bik deuh chawt a. Kei, khatih lai hun pawh a ‘tunlai’ ve tak, kohhran a in hmang lemlo leh tleirawl sual pawh neilo, kohhran mi leh inhmang tak C.Zorema nen khan kan inkawp miau mai a. RTP Cinema hall ah khan film hmuhnawm tak tak an chhuah thin a, chungte chu Zorema nen chuan kan hun awlah kan en thin a. Kohhran in film thalo a a ngaih deuhte pawh kan en a ni mahna. Khatia kan inkawp kha an kohhran lam hruaituten an lo khak deuh a ni awm asin, chu chu ama tawngkam ngei atangin ka hria a ni. Mahse C.Zorema ka kawm atang khan Pathian lam hawi chakna ka neih phah a, kohhran in sual a a ngaih thil thenkhat ka lo chin ve thin pawh ka sim phah nual a ni.
LUNGLEI GOVT COLLEGE KA MANGTHA TA : Chutia hlim tak a kan thawh ho dial dial lai chuan Lunglei Govt College chu chhuahsan a Directorate lam a ka thawh a lo ngai ta tlat mai. A college hrim hrim bakah thawhpuite leh students te ngai em em chungin April ni 30, 2005 khan ka chhuahsan ta a, May ni 2, 2005 ah hna thar ka lo vawn san ta a ni. Lunglei Govt College ka chhuahsanna pawh kum 19 zet a lo vei ta reng mai. Zirtirtu ka nih lai kha ka ngaih em em chang a tam mai. Hetia Diamond Jubilee hial an lo thleng ta hi Lunglei Govt. College zirlaite leh Zirtirtu leh staff zawng zawngte ka lawmpui tak zet a, Jubilee tam tak hmang turin ka duhsakna hlan pahin ti hian kan thawh ve lai chanchin tlem te ka rawn ziak ve a ni e.
Kum 25 ka thawh chhungin Principal 7, Pu Lalawia, Pu Darchhawna, Dr.Lalrimawia, Pu R.Biaksanga, Pu J.S.Pandey, Mrs.S. Pandey leh Pu C.Hrangdula te ka hrawn ve hman a ni. Heng ka Principal hrawn tawh zawng zawngte hi ka fak hlawm hle a, an hnuai a thawh kha a nuamin a hlimawm thin takzet a ni. Lunglei Govt.College Diamond Jubilee hlim takin le.