Power & Electric department Minister F Rodingliana chuan nimin khan a pisa-ah chanchinbumite a kawm a, Mizoram mipuite chu a tam thei ang ber in chunga solar hmanga power siam chhuah, rooftop solar bun turin a ngen a. Hemi atan hian Mizoram sorkarin hma a lak thu a sawi.
P&E Minister F Rodingliana chuan sorkar laipui scheme, PM-Surya Ghar Muft Bijli Yojana (PM-SGMBY) hnuaia rooftop solar bun chungchang sawi fiahin he scheme hnuaia solar bun duh tan central-in subsidy a pek, a benchmark an siam a san avangin mi tak takin rooftop solar hi bun an la harsat a, Mizoram sorkarin mipui tam zawkte harsatna thlir chungin hma an lak thu sawiin, “Mizoram sorkarin he scheme pawimawhzia hriain, leh man tlawm zawka mipuiten rooftop solar an bun theih nan central-ah subsidy bakah additional state subsidy a pe dawn a. Hemi atan sum ruahman zat chu Rs vbc 4 zet a ni,” a ti.
F Rodingliana chuan centralin kW 1-ah subsidy Rs 33,000 an tih bakah, Mizoram sorkar chuan AMC area-ah Rs 12,000 subsidy an pe dawn tih a sawi a. Tuna a benchmark-ah Mizoramah hian vendor hrang hrangin an tihdan a inan loh thu a sawi a. A sang ber pawlah Rs 78,000 a ni tlangpui a, Rs 80,000 kai pawh an awm a. Chumiah chuan zaa 50 aia tam, Rs 45,000 hi mipui chawi tur chauh a nih thu a sawi a. Hei erawh chuan battery a ken tel lo a, grid (electric department hrui)-ah a lut dawn a, hei hi kum tawpah anmahni account-ah a lut mai dawn niin a sawi.
AMC area atanga km 100 chinah Rs 14,000, km 100-200 inkara Rs 16,000 sorkarin mipuiah a subsidise dawn tih sawiin, “Aizawl leh Lungleia mi pawh pawisa chawi tur a inang ta deuh vek a. A hmain Aizawl amiin Rs 10,000 velin a tih theih laiin Lunglei-ah Rs 16,000 te a ni a. Chuvangin, Aizawl khawpui leh thingtlanga miten chawi a inthlauh lutuk lohna turin Mizoram sorkarin central a do letna turin hma a la tih sawiin, “kW 2-ah Rs 82,000, kW 3-ah Rs 1,10,000 kha subsidy tur a ni ta a. Zoram mipui a tam thei ang berin rooftop solar an hman theihna turin hma kan la,” a ti.
P&E minister chuan India ram state pakhatmahin subsidy an pek loh thu sawiin, “Hmannia Central Power Conference kan neihah pawh state dangin subsidy an pek loh thu an sawi a. State hrang hrangin limit an siam a, an consumer atangin zaa 35-te an pe a, keiniah chuan unlimited-in connection min pe dawn a ni,” a ti bawk.
Mizoramah vendor 12 an awm tih sawiin F Rodingliana chuan, “Application theh lut tawh consumer tam zawkte hian vendor an la thlan fel loh avangin a progress a muang rih a. Vendor thlang fel tawh consumer-te hnenah hian an thlan vendor-ten installation an tihsak zel a ni,” tia sawiin, he policy hi power indaih lohnate leh phai lama power chawkluhte tihtlemna atan mipuiin an tihtheih ve chhun a ni a, Mizoram sorkarin electric consumer-te chu he PM-Surya Ghar Muft Bijli Yojana Scheme hnuaia central leh state subsidy-te hi hmang tangkai a, thla tin electric bill a lo tlak hniam theih nan RTS install theuh turin mipui a ngen a ni.
Kum thar atang smart metre
P&E Minister F Rodingliana chuan kum thar atangin electric smart meter vuah tan an tum thu a sawi.
A pisa-a chanchinbumite a kawmnaah hian kum thar atang chuan electric smart meter vuah tan a, kalpui tan an tum tih sawiin, “Tunah hian a vuahtu tur company, Advanced Metering Infrastrusture Service Provider (AMISP) nen inremna kan ziak felin a takin kan hmang thei dawn ta a ni,” tiin, AMISP-in meter vuaha hmalak duh nghal mai mah se, hunpui zawh lamah vuah hna hi kalpui tha an tih tak zawk thu a sawi.
F Rodingliana chuan, smart meter vuah chungchangah electric bill a pung sawt tura ngaihna a tam hle tih sawiin, “Hei hi zawhna pawh ka dawng tam hle. Kan electric bill hi a tam sawt tura ngaihna a awm a, a tam sawt dawn chuang lo va, smart meter kan hman hian kan chawi ngai reng kan chawi ang a. Amaherawh chu, kan vanneih zawkna chu, thla khata kan top-up-na man zat kan hmang zo lo a nih pawhin, a ral dawn lo a, a thla leh atan a rintlang nghal theih dawn,” a ti.
Smart meter vuah a nih chuan bill hi pre-paid a pek theih tura ruahmanna an siam tih sawiin P&E minister chuan, mipui tan a dam thei ang ber tur an duh avangin, Rs 100 chu pek lawk theih hniam ber turin ruahman chhin a nih thu a sawi.