Aizawl: Mizoram Pradesh Congress Committee (MPCC) President Lal Thanzara chuan ZPM sorkarin BJP an zawmna leh an thu intiam tawn ang an tihhlawhtlin loh avangin BJP kaihhruai sorkar laipuiin a hrek tih a sawi.
Nimina Kolasib Block I-in Kolasib Venglaia Taitesena Hall-ah political training leh mi thar lawm luh hun an buatsaih hmanpuitu MPCC President Lal Thanzara chuan, sorkar inthlakah sorkar hlim local council leh village council inthlanah sorkar lai belin mi tam takin ruling an bawh ruih ruih thin a. Seat pawh hneh takin an la thin a, ZPM sorkarah chuan sorkar laia VC te, LC member te, ZPM hruaitu leh party membe- ten ni tin ZPM an chhuahsan zawih zawih tih sawiin, “Hetiang hi thil thleng ngai lo, sorkar laiah Mizoram mipui leh party mipuiin rinna an neih loh vang leh beiseina an neih loh vang a ni,” tiin, tun hnaiah ZPM, MNF leh neutral-ten phur takin Mizoram hmun hrang hrang atangin Congress an zawm chu Pathian hnathawh a nih thu a sawi.
Lal Thanzara chuan ZPM sorkarin BJP an zawmna leh an thu intiam tawn ang an tih hlawhtlin loh avangin BJP kaihhruai sorkar laipuiin a hrek tih sawiin, “Central dawrtu CM leh minister-te thil hawn chu thlalak thar an neih belh chauh hi a ni. BJP duh anga an awm hma loh chuan engmah an ti thei dawn lo va, BJP duh anga an awm hun hunah Kohhran rilru an hliam dawn avangin tunah hian tuilairapin ZPM sorkar hi a awm mek a ni,” a ti.
Congress sorkar laiin Mizoramah thlarau lam hlimna leh harhtharna an chang tih sawiin Lal Thanzara chuan, “MNF leh ZPM sorkarah erawh chuan ramin manganna leh tlakchhamna kan tawk a, mipui an rum a, mipui hnen thleng phak ruahmanna a awm loh avangin sum harsatna namen lovin a nasa,” tih sawiin, mipui sorkar tiamtute hian ZPM sorkara mi tlemte bak a huap lo tih a sawi.
Inkhawmah hian MPCC president hian an party zawm thar mi eng emaw zat a lawm lut a ni.