Aizawl: Sorkar kum kal mek (2024-2025) chhungin Mizoramah bengngawng 3,433 hmuh chhuah an ni a. A thlawnin bengdar 161 sem chhuah a ni.
Ningani khan MINECO-a DHME Auditorium-ah bengngawng leh a kaihhnawih enkawlna programme changtu, National Programme for Prevention and Control of Deafness (NPPCD) chuan kum 2024 chhunga an hmalakna thlir letna leh intuaitharna hun an hmang.
He huna tarlan a nih danin, April 2024 atang khan Mizorama bengngawng dap chhuak tura beihpui thlakna kal zelah, free clinic tum 61 neih tawh a ni a. Mi 34,056 endik niin, heng atang hian bengngawng mi 3,433 hmuh chhuah an ni a. Heng zingah hian bengngawnga chhiar theih chiah loh, beng lama harsatna nei si mi 13,403 an awm a. April 2024 – December 2024 inkar chhung khan a thlawnin bengdar 161 sem chhuah a ni.
NPPCD hnuaiah hian district pakuaah NPPCD programme hi kalpui niin, district thar pathum – Saitual, Khawzawl leh Hnahthialah pawh a rang thei ang bera neih thuai tum a ni a. Tunah hian mamawhna a san avangin khawl thar pahnih, Oto-acoustic emission (OAE Analyser) leh Tympanometer te chu district pahniha dah tura ruahman mek a ni bawk.
Review Meeting leh Refresher Training hi session hnih-ah then a ni.