Aizawl: MNF National Core Committee (NCC) member Lalchamliana chuan assembly budget session neih meka Aizawl khawpui laili atanga Assam Rifles (AR) insawn chhuah chungchangah Chief Minister Lalduhoma chu thu dik tawk lo sawiah puh.
Home minister hlui, Lalchamliana chuan nimin khan Aizawl Press Club-ah thu thar thehdarhtute a kawm a, March 10, 2025-a CM Lalduhoma’n assembly session-a AR-te Aizawl khawpui laili atanga sawn chhuak tura sorkar hmasaa home dept. nena Memorandum of Aggrement (MoA)-ah, Quarter Guard leh a chung tlang zawng zawngte pawh AR-te luah chhunzawmtir vek tur anga sawiin MoA an pawm theih loh thu sawi a, ZPM sorkarin chhuahtir vek anga a sawi chu thu dik famkim lo, politics tha lo tak hmanga sorkar hmasa beihna a nih thu sawiin, “Ngaihtuahna fim tak nena rim taka MoA lo buaipuitu home dept. official te thlenga tih mualpho tumna tha lo tak a ni,” a ti.
Lalchamliana chuan MoA hmasa kha fimkhur leh uluk takin sorkar dan engkim zawm chungin duan a nih thu sawiin, “Assam Rifles lamin ram luah zui beisei an rawn neihte pawh Mizoram sorkarin a remtih loh dan leh AR-ten an chhuahsan ngei a tul chhante pawh sorkar dan ang thlapin, felfai taka chhan let nghal vek a ni,” tiin, MoA-ah chuan Main Barrack Area (Barracks, Medical infirmary, Battalion HQ Office area, Quarter Guard, Officer’s Mess, AR Playground, School area, Residential Quarters), Mandir Area (War Memorial & M.T Garage), Assam Rifles Church Area, Mc Donald Hills leh Loch House te chhuahsan vek tura an tih thu a sawi.
Khatih hunlaia Chief Minister Zoramthanga’n a sawm angin Union Home Minister Amit Shah chuan April 1, 2023-a AR Lammual atangin AR-te Zokhawsanga an insawnna tur a hawn hnuah, AR-ho pawhin Mizoram sorkar draft MOA siam chu comment (counter argument) an rawn thawn ta thuai a. Heta AR hovin luah zui an beiseite chu Quarter Guard complex, School area (Lammual sir chhim lam), Heritage Assets leh building, Loch House-te ni mah se, sorkarin a remtih loh thu a sawi.
AR ho thil beiseite hi Mizoram sokarin a pawm theih loh thu leh an chhuahsan ngeina tura sorkar tan chhante chu chiang taka tarlangin, September 8, 2023 khan Mizoram sorkar chuan ‘Finalization of MOU…’ tiin Under Secretary, PF IV Desk, Ministry of Home Affairs hnenah H. Lalengmawia IAS, Commissioner & Secretary hmingin thawn leh nghal ni mah se, MLA inthlan puanin a nangching a, MNF sorkar chhungin sawi hona hun a awm ta lo va, ZPM sorkar thar a lo pian tak thu a sawi bawk