- Lalremliana Pachuau
He zawhna chhan tum hian mi tam takin hriatna umin, a chhan leh vang zawn hmuh ngei tumin rawngbawltu thenkhat an hmanhlel bawk. Home lamah damna hmun bika an awm chhûng zawng, fak tlak leh lang theia nun danglam neitute meuh pawh zalen tura khawvela an lo luhin, rei rial lovin an tlu chhe leh mai thin si.
Eng vangin nge ruihhlo ngaite hi kan dam tak tak theih loh a, a tam zawk kan nun hluiah kan kir leh vat thin? Kawng hrang hranga chhanna, he lam buaipuitu mi thiamte leh kum tam tak rawng lo bawl tawhtute hnen atangin kan hre thin. Chhanna an hmuh chhuah zawng zawngte hi, a dik lo tih theih pakhatmah an awm lo bawk.
Tun tumah erawh baibul atangin chhanna kan tar lang dâwn a ni. II Lalte bu kan en chuan, Suria sipai hotu Naamana chanchin kan hmu a. Naamana hi Jentail mi ni chung sia, Pathianin Suria hote chhanhimtua a ruat bik a ni teh tlat a. Kha General ropui leh lal ber kha, phâr a ni tlat a. Ruihhlo ngaite ang bawkin, natna bik a vei a nih kha.
Phâr natna vei a nihzia Naamana khân a inhre chiang hle a. A natna lak atanga dam duhin nitin hun a hmang ral thinin, a lalna leh a hausakna zawng zawng kha a hmang mawlh mawlh chungin, a dam thei chuang lo. Chutah, ama sal pawh ni lo, a nupui sal leh chhawng, hmeichhe naupang mai mai leh nghalin a phâr natna dam theihna kawng awmchhun a rawn hrilh khân, second khat pawh a tawi khawmuang hek lo.
Rang takin Samari khaw lam a pan nghal a, zawlnei Elisa hmu turin a tlan nghal hmawk hmawk a nih kha. Naamana’n dam a duhzia kha, a dam chhan bulpui ber a ni ta a ni. Mahse, dam tum dan erawh a nei thung a. A dam tum dan ni lo zawngin, damna kawng kawhhmuh a han nih pawh khân a tirah hre thiam lo mah se, han hnial ve dâwn mah se, dam a duh êm avangin rei rial lovin Jordan lui bawlhhlawh takah khân, mite lo thlir dan leh ngaihdan tur, sawisel a tawh theih dan tur zawng zawngte kha mênah thlak vekin, a zu inchiah ta a nih kha.
Ruihhlo ngaite kan dam hlen theih loh chhan bul ber chu, dam kan duh tak tak loh vang a lo ni. Ruihhlovin min han nghaisak tak tak a, nitin hreawm ti taka hun kan hman lai chuan, ruihhlo ngheia dam duhna kan nei vek a. Kalvari damdawi in panin kan in admit hreh ngai lo. Ruihhloin mi a thinletna hreawm tak pawh tuar hram hramin, kan tuar chhuak ve mai bawk.
Dam kan duh ve tak tak ni pawhin a lang hman hial a. Mahse, taksa a rawn hrisel chho deuh deuhin, khuahkhirhna hnuai ata zalenna hmuna nung turin fiahna thlaler hmunah dahin kan han awm ta a. He hmunah ngei hian a ni, mi tam zawkte chuan dam hlen duhna tak tak an lo nei hauh lo tih a lo lan fiah tak ni.
Ruihhlo ngai tam berte hian Pathian hi, kan ruihhlo ngaihna laka chhuah zalenna atân chiah kan duh bawk. Timaia fapa mit del Bartimaia nun atangin hei hi a lang chiang hle. Khatia Lal Isua’n Jeriko a fan lai khân, Thuthlung Hlui huna zawlneite meuh pawhin an tihdam ngai reng reng loh, mit delna meuh pawh Isua’n a tidam thei tih Bartimaia khân a lo hre ve tlat a.
A ban phâka Lal Isua a rawn kal tih a hriat ve leh, mipuiin nasa takin khap mah se, dam a duh êm avangin an khap bet zo ngang lo a nih kha. Bartimaia khân dam turin thil tih chhinchhiahtlak êm êm pathum a nei a. Rome sawrkar rorêlna hnuaiah khân, a bik taka phalna an pêkte chauh lo chuan kut an dawh thiang lo. Phalna nei an ni tih lantirna puan, Rome seal chuanna an sin thin. Bartimaia tân kha a puan sin kha a eizawnna ber, a nunna hnâr a ni.
Lal Isua’n a han koh chiah khân, lo dam leh si lo ta se, a puan tel lovin kut a dawh thiang lo tih pawh ngaihtuah chang lovin a paih nghal a. Tin, Lal Isua hnen a va pan lai khân, a mit delna kha a dam nghal mai lo bawk. Mahse, dam a duh êm avangin rinhlehna nei miah lovin Lal Isua a va pan a. Lal Isua’n eng nge a duh ber tia a zawh pawh khân, a duhah chiangin, “Hmuh theih ka duh” a ti nghal a nih kha.
A rinna a dampui thu Isua’n a hrilh hnu khân, Bartimaia kha lawm avangin Lal Isua theihnghilh nghal mai lovin, a hnung a zui ve ta nghal tih kan hmu ta a nih kha. He nuna hi ruihhlo ngai tam zawk neih loh nun, an dam hlen theih loh chhan, Bartimaia thil tih pathum ang an tih ve loh chu a lo ni ta a ni. Ruihhlo ngai zinga a tam berte hian, an damna turin Lal Isua an pan hreh reng reng lo.
Mahse, an han dam chiah khân Bartimaia anga engkim kalsana Lal Isua hnung zui ai chuan, khawvel leh a nawmsakna thlakhlelh leh chen an thlang zawk zel a. An duhthlanna thiang tak kal tlanga, Lal Isua aia khawvel thlangtu an nih avangin dam hlen sawi tur an vâng ta êm êm a lo ni.
Ruihhlo ngaite kan dam hlen theih loh chhan hrang hrangte hi sawi ve bawk thin mah ila, a chhan bul ber chu dam hlen kan duh tak tak lo a. Tlema kan han dam that apiangin, kan damna Lal Isua aiin khawvel leh a nawmsakna kan thlan tlat avang hian, kan dam hlen tak tak thei lo a lo ni zawk e.