Chief Minister Lalduhoma hmalaknain Aizawl khawpui tawt tihziaawmna leh Mizoramin khawpui changkang zawk a neih theih nana Thenzawl Peace City dinna tur atana master plan siam nan sorkar laipuiin Rs vbc 10 a phalsak a, a bul tan nan Rs vbc 1 a pe chhuak.
Nimina sorkar thuchhuahin a tar lan danin Thenzawl Peace City Master Plan atan hian Ministry of Housing & Urban Affairs chuan Mizoram sorkar hnenah Rs. vbc 10 a phalsak a, a bul tanna tur Rs. vbc 1 Cr (10%) chu a pe chhuak tawh a. Plan siamtu tur agency thlan fel hunah zaa 25 an pe chhuak leh ang a, draft DPR thehluh hunah zaa 35 pe chhuakin final submit hunah zaa 30 a pe chhuak leh dawn a ni.
Nilainia Thenzawl Peace City chungchang a pisa-a an sawihonaah Chief Minister Lalduhoma chuan, “Thenzawlah hian tuihna tha tak tak a awm nual a, furah phei chuan chenna inte a chim hial thin. Kan master plan-ah hian khaw laili-a lui mawi tak, dil nalh tak leh a chhehvel ram mawi tak a awm ngei tur a ni a. Sorkar hmunhma, nakkin zela kan la chhawr tangkai tur kan ruahman a ngai bawk ang. Tlang rama plan city, mawi leh khualzin hip tak, chenna atana duhawm si, ruahman ngei kan tum dawn nia,” a ti.
Agency rintlak leh hmingtha ngei thlan tum tlat ni se an tih bakah, sorkar atanga Peace City buaipuitu tur bik, Special Purpose Vehicle pawh din an rel bawk.
Hemi chungchang sawi honaah UD&PA Minister K Sapdanga, Chief Secretary Khilli Ram Menna leh sorkar mi pawimawh dangte an tel.
Tunah hian Thenzawlah hian mihring 10,000 vel cheng anga ngaih a ni a. Ram 108 sq.km huam chhung velah plan hi siamin, urban area bik chu 82 sq km ang vel tura chhut ni ta se; mipui bit zawng hi mihring 100 zelah hectare khat a nih chuan mihring nuaih 10 vel chu thawl nuam takin an khawsak thei tur a ngaih a ni a. A tul anga tihlen chhoh zel theih tura beisei a ni.