Aizawl: MPCC Adviser Zodintluanga Ralte chuan Congress party chu Mizoram mipui tana rorelna tha leh hmasawnna thlen turin an inbuatsaih tih a sawi.
Thawhtanni khan MPCC Adviser Zodintluanga Ralte hian Hrangturzo AC bial chhung Keitum, Khawlailung, North Vanlalphai leh Cherhlun khuate an tlawh a. He’ng khua a tlawhnaa Congress party mite nen inkawmin, ZPM chu sorkarna kum hnih an hman mekah an ti ang an tih an tih leh si loh te, an ti ve lo ang an tih zawng zawng an tih te hi Mizoram mipui hi a hretu an ni tih sawiin, “Heng zawng zawng hmang hian kum 2028 MLA inthlanah mipuite’n an chungah vote hmangin ro an rel ve thung tawh dawn a ni,” a ti.
Congress-in kum 10 an sorkar chhungin Mizoram tana ram leh hnam rotling sulhnu an ngah hle tih sawiin MPCC Adviser chuan, “Sorkar sawisel bo erawh kan ni lo, sawisel bo hi he khawvelah hian awm pawh a awm thei lo tih hretu vek kan ni,” a ti a. Congress party-ah bawk mipuiin beiseina lian tak an nghat chho leh tawh a, Mizoram mipui tana rorelna tha leh hmasawnna thlen tura an inbuatsaih thu a sawi.