Congress General Secretary Priyanka Gandhi Vadra chuan Uttar Pradesh politics chu chi leh sakhuaah a innghat lutuk a, hei hian politician-te pawh a pawimawh zawk a theihnghilhtir phah niin a sawi.
Gandhi chuan Congress chu tun hnai kum eng emaw zat chhungin he state-ah hian an tlakhniam ngei thu a sawi a; mahse, rim taka thawkin vantlang nen an inzawm hnai leh tan mek tih a sawi.
Chi leh sakhuanain politics-a nghawng a neih chungchang an zawhnaah Gandhi chuan, “Uttar Pradesh-a politics hi chi leh sakhuain a luah hneh tih hi a dik a; mahse, a tak takah chuan hetiang politics hian state hmasawnna tur a thlen lo. State hi a hniam zawngin a kaltir zawk a ni,” a ti.
“Uttar Pradesh-a politician-te hian an sakhua leh an hnam avangin vote an hmu dawn tih hi an thlir dan a ni thup a. Vantlang tana pawimawh zawk hi a sirah an dah daih a, hei hi mipui rorelna rama hmasawnna atan chuan a hrisel lo hle a ni,” a ti.
PTI-in ziaka zawhna pea an kawmnaah, “A awmzia tak takah chuan sorkarna leh ei bar dinhmun hi chi leh sakhuana behchhan politics hian a beng hniam zawk a ni,” tiin a chhang.
“Keini chiah hi party zinga manifesto-a hmeichhia, thalai leh Uttar Pradesh khawtlang leh politics chawi kanna tur dahtu kan ni a. Politician-te hian sorkarna leh hmasawnna hi state pumah thuchah atan an hman kan beisei a ni,” tiin a sawi.
Kum 33 zet Uttar Pradesh-a sorkarna chang tawh lo, Congress chu an lian tawk em tih zawhna chu Gandhi chuan, “Uttar Pradesh-ah hian kan pawl hi kan chak lo tih chu a dik a. Inthlan tam takah thawhpui kan nei a, chuhtu pawh zahnih atanga zathum vel bak kan chang phak ngai lo,” a ti.
“Kan dinhmun chu hetiang hi ni mah sela ka vawi khat tlawhnaah khan Congress pa leh nu tam tak kha nghet takin an lo la ding reng a ni tih ka hmu a ni,” tiin a chhang bawk.
Tuna assembly inthlanpui neih mekah hian bial 400-ah Congress hian chuhtu an nei a, hei hian an party-ah hruaitu thar tur chherin Congress pawh a tichak ngei tur thu a sawi.
“Kan party din thar leh tur hian rim takin kan thawk a. Programme kan kalpui dante pawh kan thlak a, kan mite pawh mipui nen inhnaihin kan awmtir a. Worker 1,00,000 chuan kan train a. Nyay panchayat leh gram level thlengin bul kan tan tha leh a ni,” tiin Gandhi chuan a sawi.