Aizawl: MNF party chuan nimin khan Mizoram chhung hmun hrang hrangah India leh Mizoram sorkar inremna ni champha (Remna Ni) an hmang.
Saitual district huam chhunga Remna Ni hmanna Saitualah MNF President Zoramthanga’n a hmanpui a. June 30, 1986-a inremna kha thenkhatin India leh MNF inremna tiin sawi mah se, Mizoram leh India ram inremna a ni tih sawiin, “Indonaa tel ve lote aiawhin Pu Lalkhama’n a sign a, MNF zawng zawng aiawhin Pu Denga’n a sign a, India aiawhin an sign bawk. India aiawhin MNF aiawhin Mizo mipui aiawhin he remna hi sign a ni,” a ti.
MNF president chuan, “India leh keini ramhnuai sorkar chhiat vanglai khan inremna siam ta ila, kan tlupherh rang khawp ang. Mahse, kan chak vanglai tak ve ve in remna kan sign a, constitution pawh tidanglam thei khawpin India pawh a chak a. Keini ramhnuai sorkar pawh economic leh thil dangah pawh kan chak vanglai tak a ni a, sorkar chak lo tan inremna kha sign ngawt chi a nilo, khatilai taka kha Remruattu maka chuan min nghahtir char char a lo ni,” tiin remna an siam ta tih leh Mizoram UT chu state-ah hlan kai a nih thu leh Article 371G pawh special provision a ni nghal tih a sawi bawk.
Zoramthanga chuan article 371G hian Mizo hnam dan, thubuai hla buaiah India danin a tihbuai ve theih loh a nih thu sawiin, “Ram neitu nihna leh a behbawmah India parliament-in thuneihna an nei lo. Mizoram mipui chiahin kan nei thei. He special protection hi India ramah Nagaland nen chiah kan nei a; amaherawhchu, Nagaland chuan kum 1962-ah khawngaih leh duhsak vanga pek an pek a ni a, chhuhsak sela a zo der,” a ti.
MNF president chuan India article 371G hi a lei a an lei thlap, chhuhsak ngawt theih an nih loh thu a sawi sawiin, “India sorkarin min laksak dawn chuan min pek tawh, silai chi hrang hrang leh kan thisen man te kha min pek let ve leh a ngai,” tiin, he inremna (Peace Accord) hi Zoram mipui zawng zawngin kum 20 chhung an tawrhna avanga pek a nih thu leh an chhuhsak ve ngawt thei lo tih a sawi.
Remna Ni hi Aizawl-ah pawh Mizo Hnam Run-ah MNF General Hqrs. Vice President Vanlalzawma hova hman a ni a. MNF Sr. Vice President Dr Lalthangliana hovin Champhai Vengthlang Hall-ah hman a ni a. Lunglei Mizo Hnam Runah MNF Vice President & Leader of Opposition Lalchhandama Ralte hova hman a ni a, Kolasib Hnam Runah MNF Treasurer Lalruatkima hova hman niin, National Core Committee Member Tawnluia hovin Khawzawl-ah, Serchhip-ah NCC Member R. Tlanghmingthanga, Hnahthial-ah PAC Member D. Thangliana, Lawngtlai-ah Dr. K. Pachhunga, Adviser, Siaha District-ah TJ Lalnuntluanga, General Secretary, Mamit-ah MLA Er. H. Lalzirliana, Adviser, Bungtlangah Lalremruata Chhangte, General Secretary hova hman a ni a. Hei bakah hian khaw hrang hrangah te hman niin, MNF hruaitu pawimawh tak takten an hmanpui bawk.