- Rinsanga
Democracy sorkarah chuan opposition kan tih hian sorkar lai party ni lo emaw, mipui aiawh thlan chhuah zinga sorkar lama awm lo, mahse, rorelna hmuna dinhmun pawimawh tak chelh site sawi nan kan hmang deuh thin a. An hna hi sorkar dodal mai ni loin, zawh chian, khalh ngil leh hmasawn zawnga venpui a ni.
British political theorist A.V. Dicey chuan tihian a sawi a:
“Democratic government kan tih chuan opposition ten an ngaih dan zalen taka an sawi ve theihna, an thawhpui theihna leh sawisel theihna hi a ni.”
Hemiin a sawi tum ber ni a lang chu Democracy chakna tehna ber chu opposition ten zalenna an neih dan azir tih a ni ber awm e.
- Indian Democracy-a Opposition Pawimawhna
Britain atanga kan chhawm Indian Parliamentary system hi sorkar rintlak tak ni tura duan a ni a. Opposition te hian he lungphum tidik tur hian tha thlah loa sorkar an vilna leh an sawiselna hmangte hian hma an la thin a ni.
- Accountability: Executive body te hnathawh hlawhchham an chhuiin, an zawt fiah a, pawisa hman dan felhlel te, emaw eirukna ngialngan ang te pawh question hour chhung leh hun dangah pawh zawhna an zawh thin a tul hle a ni.
- Legislative Role: Bill put luh thlit fim leh dan siam that ngai lai siam tha tura theh luh kawngah an tangkai hle.
- Representation: Society a aw rawl zawi zawk leh ngaihthah tawk mekte tan aw chhuahtu pawimawh tak an ni.
- Alternative Governance: Sorkar dinglai ni lo sorkar dang tha zawk a awm thei a ni tih an entir thei a, mipui tan duhthlan tur dang an hlui thei.
- Public Awareness: Thusawi hmang te, kawngzawh leh protest te, press conference leh media hmangtein sorkar kal dik lohna puang chhuaktu an ni.
- Opposition Chak Pawimawhna
*
Authoritarianism lakah min veng: En chiktu leh vengtu tel loa sorkar a duh ang anga a sapatal tur vengtu pawimawh tak a ni. - Thuthlukna siam puitu : Awmze nei zawka sorkar sawiselna hian dan tha zawk siam kawngah leh thuthlukna siam kawngah sorkar a pui a ni.
- Mipui dikna chanvo a humhim: Mipui ngaihthah leh neksawra awmte, hlamchhiah zawkte an humhim thin.
- Inhnialna tha zawk siamtu an ni: Finna leh awmze nei zawka mipui kaihhruaina kawngah debate tha tak tak an hlui thei a, mipui khawthlir siam thatu pawimawh tak an ni.
- Rei tak lal tur vengtu an ni: Sorkar thlakthlengna lo awm hian mipuite min venghim a, lal ngai reng an lal a, eiruk leh hlemhletna a tam a hlauhawm a, duhthlan tur dang lo awm hi a tha hle a ni.
Vladimir Putin kaihhruai sorkar khi kan en chuan eptu chak a neih loh avangin ram mipui tam takin an tuar a, aw an chhuah ngam lo a, a duh chen chen lalna a chelh miau avangin sorkar tha ziktluak a ni thei lo a ni. Chutiang bawkin Myanmar (Burma) lamah opposition chak an han nei ve dawn a, Aung San Suu Kyi chu hren beh a nih miau avangin mipuiin nasa takin an tuar mek bawk tih kan hre thei a ni. China leh ram dang dang pawh kan hre theuh awm e.
Chutih rualin opposition in an chanvo hneh taka an hlenna ram USA, Japan, UK leh India ram angah hi chuan mipui kan thu a, sorkar hi kan duh hunah kan thlakin, kan tungding thei bawk a ni. Hei hian opposition pawimawhzia a tichiang viau awm e.
- Tlipna:
Democracy hrisel leh tha hi sorkar lai mek thawm rinnaah a innghat lo a, opposition ten zalen taka aw an chhuah dan hian a hril mah zawk a ni.
Opposition tha chu democracy darthlalang ang an ni a— sorkar mek thatna leh chak lohna fiah takin mipui tan an tar lang thin. Opposition ten hmathlir thui leh rem hre taka an kalnaah chuan, sorkar an thuam chak mai lo a, mipui tan an ding a, sorkar chu mipui ta a nih an hrilh nawn a, mipuiin hlim takin an zalenna an chen thin a ni.